अखबार नेपाल ट्रेन्डिङ

काठमाडौं: कोरोनाभाइरस नेपालमा पनि तीव्र रुपमा फैलिरहेको छ । शुक्रबारसम्मको विवरणमा २ सय ७६ जनामा संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार हालसम्म नेपालका ७७ मध्ये २६ जिल्लामा कोरोना भाइरसको संक्रमण फैलिएको छ । संक्रमित मध्ये ३६ जना निको भएर घर फर्किएको स्वास्थ्य मन्त्रालयले जानकारी दिएको छ ।

मन्त्रालयका अनुसार हालसम्म सबैभन्दा धेरै संक्रमित पर्सामा फेला परेका छन् । भाइरसको संक्रमण फैलन नदिन सरकारले देशभर लकडाउन घोषणा गरेको पनि ५४ दिन भैसकेको छ । यो बीचमा जम्मा ८७ हजार व्यक्तिको नमूना परीक्षण गरिएको छ ।

हालसम्म पर्सामा ९१ जना, कपिलवस्तु ४१, बाँके ३३, रुपन्देही २८, उदयपुर ३३, काठमाडौं ९, धनुषा र कैलालीमा ४, चिवन, रौतहट, बारा र दाङ ३, सर्लाही, बर्दिया, बाग्लुङ, झापा, महोत्तरी, भक्तपुरमा २/२ जना, धादिङ, भोजपुर, कञ्चनपुर, नवलपरासी (पश्चिम), सप्तरी, पूर्वी नवलपरासी, मकवानपुर, सिरहमा १/१ जना रहेका छन् ।

शुक्रबारसम्म पिसिआर विधिबाट २३ हजार ९ सय १४ जनाको नमूना परीक्षण गरिएको छ भने आरडिटीबाट ६३ हजार ८५ जनाको परीक्षण गरिएको छ । देशभरिका विभिन्न अस्पतालमा २ सय ६७ जना आइसोलेसनमा उपचाररत छन् । हालसम्म कर्णाली प्रदेश कोरोनामुक्त रहेको छ । देशभरिका क्वारेन्टाइनमा १५ हजार ६ सय ८३ जना रहेका छन् ।