अखबार नेपाल ट्रेन्डिङ

काठमाडौं: नेपाल सरकारले विदेशमा अलपत्र परेका मध्ये ३५ हजार नेपालीलाई पहिलो चरणमा नेपाल ल्याउने कार्ययोजना तयार गरेको छ । परराष्ट्र मन्त्री प्रदीपकुमार ज्ञवालीले आइतबार सरोकारवाला मन्त्रालयका सचिव, महानिर्देशकहरु तथा सहसचिवहरु सम्मिलित बैठकमा यस्तो कार्ययोजना प्रस्तुत गरेका हुन् ।

विदेशमा भएका नेपाली तथा बैदेशिक रोजगारमा रहेका नेपालीलाई कसरी स्वदेश फर्काउने भन्ने विषयमा यसअघि गठन भएको अध्ययन समितिका तर्फबाट परराष्ट्र मन्त्रालयका सहसचिव तापस अधिकारीले सो कार्ययोजनासहितको प्रतिवेदन पेश गरेका थिए । बैठकमा श्रम, पर्यटन र परराष्ट्र मन्त्रालयका सचिव र मातहतका महानिर्देशकको सहभागिता थियो ।

कार्यदलले विभिन्न देशमा ओभर स्टे गरेका करिब ३५ हजार युवालाई पहिलो चरणमा, रोजगारी गुमाएका र स्वदेश फर्कन चाहने दोश्रो चरणमा र बिदामा आउन चाहनेलाई तेस्रो चरणमा राखेको छ । ओभर स्टे भई विदेशमा अलपत्र परेका युबालाई सम्बन्धित देशले नेपाल फर्काइ दिने र पछि रोजगारीका लागि ती देश जान चाहनेलाई कानुनी अड्चन नराख्ने भएकोले पहिलो चरणमा राखेर नेपाल ल्याउनुपर्ने भएको मन्त्री ज्ञवालीले बताए ।

मन्त्री ज्ञवाली भने- ‘करिव ३ लाख युवालाई अन्तराष्ट्रिय एयरपोर्ट खुलेपछि स्वदेश ल्याउने र त्यतिन्जेलमा देशभित्र नै रोजगारी सिर्जना गर्ने तवरले अध्ययन, छलफल चलिरहेको छ ।’ अहिले खाडी राष्ट्रमा रोजगारीमा रहेका युवालाई जो जहाँ छन सुरक्षित रहन र बस्न दिन प्रधानमन्त्री र मन्त्रीस्तरमा सम्बन्धित देशका काउन्टर पार्टसग फोनवार्ता पनि भइरहेको छ । मन्त्री ज्ञवालीको भनाई छ ।