अखबार नेपाल ट्रेन्डिङ

काठमाडौं: नेपाल कम्युनिस्ट पार्टीभित्रको चुलिँदो विवादका कारण पार्टी अध्यक्ष तथा प्रधानमन्त्री केपी शर्मा ओली आफ्नो सरकारको निरन्तरताको अस्त्र खोज्न थालेका छन् । अर्का अध्यक्ष पुष्पकमल दाहाल, वरिष्ठ नेता माधवकुमार नेपालसहित प्रायः अधिकांश शीर्ष नेता ओलीलाई पदच्यूत गर्ने कसरतमा लागेपछि प्रधानमन्त्री ओली सकेसम्म पार्टीभित्र नयाँ समीकरण बनाउने प्रयासमा जुटेका छन् ।

ओली र वरिष्ठ नेता माधव नेपाल पक्षबीच सोमबार भएको छलफलले मंगलबार सचिवालय बैठक गर्ने तय गरेको छ । प्रधानमन्त्री केपी शर्मा ओली आफैं अध्यक्ष रहेको दल नेपाल कम्युनिस्ट पार्टीबाट यसरी घेराबन्दीमा परेका छन् । अर्का अध्यक्ष पुष्पकमल दाहाल र वरिष्ठ नेता माधवकुमार नेपाल समर्थित बहुमत स्थायी समिति सदस्यले लिखितरुपमै बैठक माग गरेपछि ओली अहिले अनेक ‘अफर’हरु गरेर नेपाललाई फकाउने प्रयत्न गरिरहेका छन् ।

आन्तरिक किचलो शान्त नभए प्रधानमन्त्रीलाई स्थायी समितिबाटै असजिलो पार्ने र नभए संसदमा अविश्वासको प्रस्तावसम्म ल्याउनेबारे ओलीविरोधी समूहमा छलफल भइरहेको बताइन्छ । संविधानको धारा १०० को उपधारा ४ बमोजिम ‘प्रतिनिधिसभामा तत्काल कायम रहेका सम्पूर्ण सदस्यहरुमध्ये एक चौथाइ सदस्यले प्रधानमन्त्रीमाथि सदनको विश्वास छैन भनी लिखितरुपमा अविश्वासको प्रस्ताव पेस गर्न सक्नेछन्’ भनिएको छ ।

प्रधानमन्त्रीलाई पदच्यूत गर्न अविश्वासको प्रस्तावको संवैधानिक हतियार प्रयोग गर्न खोजियो भने प्रधानमन्त्रीले पनि प्रतिरक्षा अस्त्रका रुपमा प्रतिनिधिसभा विघटन गरी मध्यावधि निर्वाचनको बाटो लिन सक्ने विश्लेषण पनि भइरहेको छ । प्रधानमन्त्रीले संसद विघटनको बाटो लिए भने नेकपाभित्र आन्तरिक द्वन्द्व चुलिने र राजनीतिक तथा संवैधानिक प्रश्नहरुमा मुलुक झनै रुमल्लिने सम्भावना देखिन्छ ।