अखबार नेपाल ट्रेन्डिङ

रामेछापः गाउँमा स्थापना भएको सामुदायिक मेलमिलाप केन्द्रमा गाउँकै मेलमिलापकर्ताहरुले विवाद समाधान गर्न थालेपछि गाउँलेहरु विवाद समाधान गर्न मेलमिलाप केन्द्र तर्फ आकर्षित भएका छन् ।

जिल्लाका ६४ वटा वडाहरु तथा ८ वटा गाउँपालिकाहरुमा स्थापना भएका ७२ वटा सामुदायिक मेलमिलाप केन्द्र मार्फत विवादहरु समाधान हुँदै आएका छन् । गाउँमा सामान्य विवादहरु मिलाउन अड्डा अदालत धाउन नपरेपछि समय तथा पैसाको वचत हुनुका साथै जित जितको अबस्थामा विवाद मिल्ने भएकाले यसतर्फ आकर्षित भएको स्थानीयहरुले बताए ।

आफ्नो विवाद आफैंले रोजेको मेलमिलापकर्ता मार्फत गाउँमा नै जित जितको अबस्थमा समाधान हुने भएकाले आफुहरु यसतर्फ आकर्षित भएको रामेछाप नगरपालिका-९ का ४० बर्षका नबराज श्रेष्ठले बताए । छिमेकी टिकाराम कसाईंसँगको जग्गाको सिमाना विवादका कारण निकै तनाव बेहोर्दै आएका नवराज र टिकाराम अहिले खुशी साथ असल छिमेकीका रुपमा बस्दै आएका छन् । स्थानीय सरकारसँगको समन्वयमा वडा कार्यालयहरुमा स्थापना भएका मेलमिलाप केन्द्रहरुमा अहिले ६ सय ८१ जना मेलमिलापकर्ताहरु सक्रिय रहेका छन् ।

मेलमिलापप्रति आकर्षित भएकै कारण आफ्नो गाउँको मेलमिलाप केन्द्रमा दैनिकजसो विवादहरु दर्ता हुन उक्त मेलमिलाप केन्द्रबाट अहिलेसम्म ७० वटा विवादहरु समाधान भएको गोकुलगंगा गाउँपालिका-३ रस्नालुको सामुदायिक मेलमिलाप केन्द्रका संयोजक ओलकबहादुर सुनुवारले जानकारी दिए ।