अखबार नेपाल ट्रेन्डिङ

काठमाडौं: नेपाल सरकारले विश्वमा महामारीको रुपमा फैलिएको कोरोना भाइरस संक्रमण नियन्त्रणका लागि सिनेमा हल, खेलस्थल, जीम, डान्स बार तथा क्लब लगायतलाई बन्द गर्ने निर्णय गरेको छ । उपप्रधान एवं रक्षामन्त्री ईश्वर पोखरेलको नेतृत्वमा रहेको कोरोना भाईरस रोकथाम तथा नियन्त्रणका लागि उच्च स्तरीय समन्वय समितिले ३० अप्रिलसम्मलाई ती क्षेत्र बन्द गर्ने निर्णय गरेको हो ।

बुधबार गरिएको निर्णयको बुँदा नम्बर २ मा ‘सिनेमा हल, सांस्कृतिक केन्द्रहरू, रंगशाला, खेलस्थल, जीम, हेल्थ क्लब, म्युजियम, स्वीमिङ पुल, मनोरञ्जन स्थान, डान्स बार तथा क्लब आदिलाई ३० अप्रिल २०२० सम्म बन्द गर्ने साथै यसको अनुगमनको जिम्मेवारी गृहमन्त्रालय, संस्कृतिक, पर्यटन तथा नागरिक उड्डायन मन्त्रायल र सञ्चार तथा सूचना प्रविधि मन्त्रालयलाई दिइएको छ ।

यसैगरी निर्णयको १३ नं. बुँदामा होटल, रेष्टुरेन्ट तथा सपिङ् मलमा हात सफा गर्ने स्यानिटाइजर लगायत सफाइका सामग्रीको प्रबन्ध गरी टेबल, कुर्सी, बार-रेलिङ र शौचालय आदि स्थानमा नियमित रुपमा डिसइन्फेक्सन गर्न साथै, तापक्रम मापन गर्ने उपकरण तथा सामग्रीको व्यवस्था गरी ती स्थानहरुमा प्रवेश गर्ने व्यक्तिको सवास्थ्य जाँच गर्न सञ्चालकहरुलाई निर्देशन दिईएको छ ।

विद्यालय तथा कलेज बन्द गर्ने निर्णय
यसैबीच नेपाल सरकारले चैत मसान्तसम्म विद्यालय तथा कलेज बन्द गर्ने निर्णय गरेको छ । उपप्रधान तथा रक्षामन्त्री ईश्वर पोखरेल नेतृत्वको कोभिड–१९ रोकथाम तथा नियन्त्रण उच्च स्तरीय समितिले बुधबार २०७६ चैत मसान्तसम्मका लागि बन्द गर्ने निर्णय गरेको हो ।

उपप्रधान तथा रक्षामन्त्री पोखरेलले चैत ६ गते सन्चालन हुन गईरहेको एसईई परीक्षाको प्रत्येक केन्द्रमा स्वास्थ्य जाँच सहित हेल्थ डेस्क स्थापना गरी सुरक्षित एवं व्यवस्थित रुपमा सम्पन्न गर्ने तथा बाल बिकास केन्द्र, आधारभूत तथ माध्यमिक बिद्यालय तथा विश्व बिद्यालयको पठानपाठन २०७६ चैत्र ३० सम्म बन्द रहने जानकारी गराएका छन् ।