अखबार नेपाल ट्रेन्डिङ

काठमाडौं: त्रिकोणात्मक टी-ट्वान्टी अन्तर्राष्ट्रिय सिरिजमा घरेलु टोली नेपालले लगातार दोस्रो जित निकालेको छ ।

त्रिवि क्रिकेट मैदानमा बुधबार मलेसियालाई ६ विकेटले हराउँदै नेपालले लगातार दोस्रो जित निकालेको हो ।

सिरिजमा मलेसियाले भने पहिलो हार ब्यहोरेको छ । मलेसियाले सिरिजको आफ्नो पहिलो खेलमा पीएनजीलाई ८ रनले हराएको थियो ।

मलेसियाले दिएको १ सय १५ रनको सामान्य लक्ष्य नेपालले १३ दशमलव ४ ओभरमा ४ विकेट गुमाउँदै भेट्टायो ।

आशिफ शेखले ५७ रनको महत्वपुर्ण योगदान दिए । ३८ बलको सामना गरेका उनले ७ चौका र १ छक्का हाने । उनी १२ ओभरको तेस्रो बलमा लामो सट खेल्ने धुनमा हुँदा क्याच आउट हुन पुगे ।

आशिफको यो टी २० आईमा दोस्रो अर्धशतक हो । आशिफले ३१ बलमा ६ चौका र १ छक्का हान्दै अर्धशतक पूरा गरे ।

दिलिप नाथ १५ र कुशल मल्ल २ रनमा नटआउट रहे । तेस्रो विकेटका शेख र ऐरीले ७० रनको साझेदारी गरेपछि नेपाल सहज जिततर्फ उन्मुख भएको थियो ।

ओपनर कुशल भुर्तेल १ रनमा पवेलियन फर्के । कुशल पवनदिप सिहंको बलमा विरनदिप सिंहको हातबाट क्याच आउट भए ।

दिपेन्द्र सिंह ऐरि २१ रन थप्दै पवेलियन फर्के। रोहित पौडेल १२ रन बनाउँदा पवनदिपको बलमा एलबीडब्लु धरापमा परे ।

मलेसियाका लागि पवनदिप सिंहले २ तथा सहिद अजिज र मुहम्मद अमिरले समान एक विकेट लिए ।

टस जितेर ब्याटिङ गरेको मलेसियाले निर्धारित २० ओभरमा ८ विकेटको क्षतिमा १ सय १४ रनको योगफल तयार पारेको थियो ।

नेपालका लागि कप्तान सन्दीप लामिछाने र करण केसीले समान २ विकेट झारे । अविनास बोहोरा, कुशल मल्ल र दिपेन्द्र सिंह ऐरिले समान एक विकेट झारे ।

सन्दीपले आफ्नो स्पेलमा २७ रन खर्चे । ऐरिले ४ ओभरमा १४ रन खर्चेर एक विकेट लिए । करण केसीले ३ ओभरमा मात्र १६ रन खर्चेर २ विकेट झारे ।

नेपालका तिव्र गतिका बलर करण केसीले पहिलो ओभरको पहिलो बलमा नै मलेसियाका ओपनर विरनदिप सिंहलाई शुन्य रनमा आउट गर्दै पहिलो सफलता दिलाएका थिए ।

दोस्रो विकेटका लागि जुवैदी जुल्कीफ्ली र कप्तान अहमद फैजले ४९ रनको साझेदारी गरे । जुवैदी ३२ रनमा कुशल मल्लको बलमा बोल्डआउट भए । उनले १५ बलमा ३ चौका र २ छक्का हाने ।

२४ रनको योगदान दिएका कप्तान फैज नेपालका कप्तान सन्दीप लामिछानेको बलमा क्याच आउट भए । ३८ बलमा ३ चौका हानेका फैज १२ औँ ओभरको दोस्रो बलमा लामो सट खेल्ने धुनमा क्याच आउट भए ।

सायद अजिज १४ रनमा क्याच आउट भए । अजिज दिपेन्द्र सिंह ऐरिको बलमा सन्दीपको हातबाट क्याच आउट भए । मुहम्मद आमिर १६ रन बनाउँदा अविनास बोहोराको बलमा एलबीडब्लु धरापमा परे ।

सर्भिन मुनियान्डी ९ रनमा पवेलियन फर्के । उनी सन्दीपको बलमा कुशल भुर्तेलको हातबाट क्याचआउट भए ।

त्रिकोणात्मक सिरिजको पहिलो खेलमा नेपालले पपुवा न्यु गिनीमाथि १५ रनको रोमाञ्चक जित निकालेको थियो ।

सिरिज अन्तर्गतको चौथो खेलमा नेपालले बिहीबार पीएनजीसँग खेल्नेछ ।