अखबार नेपाल ट्रेन्डिङ

काठमाडौ : केही समय अगाडी निर्माण व्यवसायी शरद गौचनको हत्या आरोपका जेलमा रहेका गुण्डा नाइके समिरमान बस्नेतले जेलबाटै असुली धन्दा मच्चाएको समाचार बाहिर आएको थियो ।

त्यसै गरी गुण्डा नाइके रमेश बाहुनले पनि जेलबाटै गुण्डाराज चलाउन थालेको रहस्योदघाटन भएको छ । बाहुनले जेलबाटै असुली धन्धा चलाउन थालेको रहस्य अर्को गुण्डा नाईके दुर्गा राई पक्राउ परेपछि खुलेको हो ।

काभ्रे नमोबुद्ध घर भएका राईलाई हानगरीय प्रहरी परिसर काठमाडौंको टोलीले कोटेश्वरबाट पक्राउ गरेपछि बाहुनको गुण्डाराजको पर्दाफाँस भएको हो । पक्राउ परेका राईविरुद्ध सार्वजनिक शान्तिविरुद्धको कसुरमा म्याद लिएरअनुसन्धान सुरु गरेको प्रहरीले जनाएको छ ।

रेलको ठेक्का भएको बेला केही ठेकेदारहरुबाट बाहुनकै निर्देशनमा रकम असुली गरेको सूचना प्रहरीले पाएको थियो । अहिले सरकारले उक्त रेलको ठेक्का भने रोक्का गरेको छ।

पक्राउ परेका राईको मोबाइल असुली धन्दाको केही प्रमाण हुनसक्ने भन्दै प्रहरीले उनको मोबाइल फरेन्सिक जाँचका लागि पठाएको जनाएको छ।

पक्राउ परेका गुण्डा नाइके देवान नामले समेत परिचित छन् । उनी अर्का गुण्डा नाइके मिनकृष्ण महर्जनलाई गोली हानेको आरोपमा राई तीन वर्ष जेल बसेर छुटेका व्यक्ति हुन्।