अखबार नेपाल ट्रेन्डिङ

काठमाडौं: स्वास्थ्य तथा जनसंख्या मन्त्रालयका अनुसार डेंगी संक्रमणका कारण देशभर मृत्यु हुनेको संख्या २९ पुगेको छ ।

मन्त्रालयले शनिबारसम्म २९ जनाको डेंगीका कारण मृत्यु भएको पुष्टि भएको जानकारी दिएको छ । मन्त्रालयका अनुसार हाल देशका ७६ वटा जिल्लामा डेंगीको संक्रमण फैलिएको छ ।

हालसम्म देशमा सबैभन्दा धेरै बागमती प्रदेशमा संक्रमित भएका छन् भने सबैभन्दा कम कर्णाली प्रदेशमा संक्रमित भएका छन् ।

बागमतीमा १७ हजार ७३१ जना संक्रमित भएका छन् । यस्तै लुम्बिनीमा २ हजार ८२१ जना संक्रमित हुँदा सुदूरपश्चिममा ७७७ जना संक्रमित भएका छन् ।

यस्तै प्रदेश १ मा ५९१, गण्डकीमा ५१५ र मधेस प्रदेशमा ३२३ जनामा संक्रमण भएको पुष्टि भएको छ । सबैभन्दा कम कर्णाली प्रदेशमा हालसम्म २३० जनामा डेंगीको संक्रमण भएको छ ।

नेपालमा पहिलो पटक डेंगी २०६१ मा देखिएको थियो । त्यसयता वर्सेनी नेपालमा डेंगी संक्रमण देखिन थालेको छ । गत साउन यता हालसम्म देशभर २२ हजार ९८८ जनामा डेंगी संक्रमण पुष्टि भइसकेको छ ।