अखबार नेपाल ट्रेन्डिङ

एजेन्सी : भारतको उत्तर प्रदेश राज्यस्थित सोनभद्रको सोन पहाडी र हरदी इलाकामा सुन खानी भेटिएको छ । स्थानीय प्रशासनले सुन खानी भेटिएको पुष्टि गरेपछि त्यहाँका नागरिक खुशी भएका छन् । उत्तर प्रदेश सरकारले सोनभद्रको हरदी गाउँ इलाकास्थित दुई पहाडमा सुन, युरेनियमसमेत कयौँ धातुको विशाल खानी रहेको पुष्टि गरेको छ । यही रिपोर्टले स्थानीयमा खुसीको लहर ल्याएको हो ।

रिपोर्ट अनुसार यी पहाडी क्षेत्रमा ३ हजार टन सुनको खानी भेटिएको हो । जसको लिलामीका लागि सरकाले प्रक्रिया थाल्न लागेको छ । भारत अहिलेसम्म संसारकै सबैभन्दा थोरै सुनखानी रहेको देशमा पर्छ । तर यो सुन खानी भेटिएपछि अब भारत विश्‍वकै दोस्रो धेरै सुन भएको देशमा हुनेछ । जानकारी अनुसार अहिलेसम्म अमेरिका पहिलो नम्बरमा छ । अमेरिकासँग ८,१३३.५ टन सुन छ । जर्मनीसँग ३,३६६ टन रहेको छ । तेस्रो नम्बरमा अन्तर्राष्ट्रिय मुद्रा कोषसँग २,८१४ टन सुन छ । त्यसपछि इटाली, फ्रान्स, र रूससँग बराबरी सुन छ ।

उत्तर प्रदेशको सोनभद्र जिल्लामा सुन खानी मिलेपछि त्यहाँको पूरै क्षेत्रमा उत्साहको माहोल छ। समाचार अनुसार हरदी गाउँ, महुली गाउँसमेत एक दर्जन गाउँबासी रोजगार मिल्ने कुरालाई लिएर उत्साहित छन् । सोनभद्रको सुनले भारत सरकारसँग रहेको सुनको भण्डारमा पाँच गुणा वृद्धि हुनेछ । उत्तर प्रदेश सरकारले सुन र युरेनियम भण्डाको पुष्टि भएपछि पहाडको लिलामी प्रक्रिया अघि बढाउनेछ । सोनभद्र जिल्लाको सोन पहाडमा सुनको भण्डारका साथै पहाडमुनि युरेनियमको विशाल खानी पनि रहेको अनुमान गरिएको छ ।