अखबार नेपाल ट्रेन्डिङ

एजेन्सी: अमेरिका र चीनबीच पहिलो चरणको व्यापार सम्झौतामा सहमति भएको छ । दुई देशबीच पछिल्लो १७ महिनादेखि चलेको व्यापार युद्ध तत्काललाई रोकिएको छ । अमेरिकी राष्ट्रपति डोनाल्ड ट्रम्पले व्यापार सम्झौता सहमतिमा चीनसँग सम्झौतापत्रमा हस्ताक्षर गरिसकेका छन् ।

सम्झौताको शर्तमा एक सय ६० अर्ब डलरको चिनियाँ सामानमा १५ डिसेम्बरदेखि लाग्ने भनिएको अमेरिकी कर टरेको छ । समाचार अनुसार अमेरिकाले घरेलु विद्युतीय सामाग्री र खेलौनामा अतिरिक्त कर लगाउन लागेको थियो । यो सहमतिपछि चीनबाट आइरहेका सामानमा लगाइएको अतरिक्त शुल्कमा ५० प्रतिशत कटौती गरिएको छ ।

सहमति अनुसार चीनले सन् २०२० मा अमेरिकाबाट ५० अर्ब अमेरिकी डलरको कृषि उत्पादन र अन्य वस्तु किन्ने भएको छ । व्यापार युद्धका क्रममा चीनले अमेरिकाबाट कृषि उत्पादन किन्न बन्द गरेको थियो । व्यापार युद्धका कारण दुवै देशको अर्थव्यवस्थामा ठूलो असर भइरहेको थियो । सेयर बाजारमा समेत विश्वका प्रमुख २ अर्थव्यवस्थाबीचको यो सम्झौताको समाचारले दुनियाँभरका सेयर बाजारमा उतारचढाव आएको छ । व्यापार युद्धका कारण विश्वभरका सेयर बजारमा समेत ठूलो घाटा भएको थियो ।