अखबार नेपाल ट्रेन्डिङ

एजेन्सी: बेलायती प्रधानमन्त्री बोरिस जोनसनको कन्जर्भेटिभ पार्टीले त्यहाँको आम चुनावमा बहुमत प्राप्त गरेको छ । कूल ६ सय ५० सिटमा बिहीबार आम चुनाव भएकोमा कन्जर्भेटिभ पार्टीले बहुमत पाएको हो । ६ सय १३ निर्वाचन क्षेत्रको मतगणना भइसक्दा उनको पार्टीले ३ सय ५१ क्षेत्रमा जित हासिल गरेको छ । बहुमत प्राप्त गर्नका लागि ३ सय २६ सिट ल्याए हुन्छ ।

विपक्षी लेबर पार्टीले भने अहिलेसम्म जम्मा २ सय २ क्षेत्रमा मात्रै जित हासिल गरेको छ । कन्जर्भेटिभ पार्टीले अघिल्लो चुनावमा भन्दा ४६ बढी क्षेत्रमा जित हात पारेको छ भने विपक्षी लेबर पार्टीले ५८ सिट गुमाएको छ । अब १९ क्षेत्रको मात्रै मत परिणाम आउन बाँकी रहेको छ । चुनावमा बहुमत प्राप्त गर्न नसकेपछि लेबर पार्टीका नेता जेरेमी कोर्बिनले अर्को चुनावमा पार्टीको नेतृत्व नगर्ने घोषणा गरेका छन् ।

आम चुनावमा पार्टीले बहुमत प्राप्त गरेसँगै अब प्रधानमन्त्री जोनसनलाई ब्रेक्जिटका लागि सजिलो हुने ठानिएको छ । अब उनलाई आफ्नो शर्त अनुसार युरोपेली संघबाट अलग हुन सजिलो हुनेछ । युरोपेली संघसँग सम्झौता गरेर बाहिरिने या नबाहिरिने भन्ने विवादले बेलायतमा राजनीतिक संक्रमण झन् गहिरिएको थियो । जोनसन संघसँग सम्झौता बिनै बाहिरिने पक्षमा थिए । तर, उक्त प्रस्तावलाई संसदले अनुमादन नगरेपछि गत अक्टोबरमा उनले तत्काल अर्को आम चुनावको प्रस्ताव लगेका थिए । उनले यो प्रस्तावलाई भने बहुमत सांसदले अनुमोदन गरेका थिए ।