अखबार नेपाल ट्रेन्डिङ

एजेन्सी: भारतीय राज्यसभाबाट नागरिकता संशोधन विधेयक २०१९ बुधबार पारित भएको छ । राज्यसभामा विधेयकको पक्षमा १ सय २५ मत परेका थिए भने १ सय ५ मत विपक्षमा परेका थिए । शुरुमा उक्त विधेयक विशेष समितिमा पठाउनेबारे मतदान भए पनि असफल भएको थियो । उक्त विधेयक सोमवार लोकसभाबाट बहुमतले पारित भएको थियो ।

अब भारतीय राष्ट्रपतिले हस्ताक्षर गरेपछि विधेयक कानुन बन्नेछ । गृहमन्त्री अमित शाहले विधेयक राज्यसभामा पेश गर्नासाथ विपक्षी सांसदले हंगामा मचाएका थिए । विधेयकले अल्पसंख्यक मुस्लिमलाई अत्याचार गरेको उनीहरूको दाबी छ । विपक्षीले यो विधयकले भुटान, श्रीलंका र म्यान्माका हिन्दु, बौद्ध, शिख धर्मावलम्बीलाई नसमेटेको भन्दै विरोध गरेका थिए । नागरिकता संशोधन विधेयक पारित भएपछि भारतीय प्रधानमन्त्री नरेन्द्र मोदीले यसलाई ऐतिहासिक भन्दै खुशी प्रकट गरेका छन् । धार्मिक आधारमा उत्पीडित व्यक्तिले यसबाट सम्मानको जीवन बाँच्न पाउने उनले उल्लेख गरेका छन् ।

यता कंग्रेस अध्यक्ष सोनिया गान्धीले भने विधेयक पारित हुनु भारतका लागि कालो दिन भएको दाबी गरेकी छन् । नागरिकता संशोधन विधेयकको विरोधमा असममा विरोध शुरु भएको छ । प्रदर्शनकारीले राजधानी दिसपुरमा बसमा आगजनी गरेका छन् । प्रदर्शन हिंस्रक बन्दै गएपछि असमका १० जिल्लामा बुधवार साँझदेखि २४ घण्टाका लागि इन्टरनेट सेवा बन्द गरिएको छ । डिब्रुगढमा रेलसेवा बन्द भएको छ । आसममा बुधवार रातिसम्म ५ हजार अर्धसैनिक पठाइएको छ । आन्दोलनका कारण त्यस इलाकमा शैक्षिक संस्था समेत ठप्प छन् ।