अखबार नेपाल ट्रेन्डिङ

एजेन्सीः पाकिस्तानले फेरि एक पटक अफगानिस्तानमा एयरस्ट्राइक गरेको छ । आइतबार बिहान सबेरै सीमावर्ती क्षेत्रमा गरिएको आक्रमणमा कम्तीमा १६ जनाको मृत्यु भएको मानवअधिकार संगठनले जनाएको छ । अफगान अधिकारीका अनुसार आक्रमणमा एकै परिवारका सबै १३ सदस्य पुरिएका छन् । जसमध्ये चारजनाको ज्यान गइसकेको छ ।

अल जजिराका अनुसार पाकिस्तानी सेनाले तहरीक-ए-तालिबान पाकिस्तान (टीटीपी) र इस्लामिक स्टेटसँग सम्बन्धित सातवटा क्याम्प र ठेगानालाई निशाना बनाएको दाबी गरेको छ । पाकिस्तान सरकारले हालै भएका आत्मघाती हमलाको जवाफस्वरूप ‘इन्टेलिजेन्स बेस्ड अपरेसन’ सञ्चालन गरिएको जनाएको छ । सूचना तथा प्रसारण मन्त्रालयले अफगान भूमिबाट सञ्चालित सञ्जालले पाकिस्तानमा आक्रमण गराएको पुख्ता प्रमाण रहेको दाबी गरेको छ ।

टोलोन्यूजका अनुसार नांगरहार प्रान्तमा एउटा घरमा आक्रमण हुँदा एकै परिवारका २३ जना भग्नावशेषमा पुरिएका थिए । हालसम्म चार जनालाई मात्र बाहिर निकालिएको छ । आक्रमणका बेला यो परिवार सुतिरहेको थियो । अन्तर्राष्ट्रिय मानवअधिकार फाउन्डेशनका अनुसार यो घटनामा १६ जनाको मृत्यु भएको छ, जसमा महिला र बालबालिका पनि छन्। यद्यपि आधिकारिक तथ्यांक अझै सार्वजनिक भएको छैन ।

अफगानिस्तानको चेतावनी

अफगानिस्तानको रक्षा मन्त्रालयले पाकिस्तानलाई ‘उचित समयमा कडा जवाफ दिने’ चेतावनी दिएको छ । मन्त्रालयले यसलाई अफगान सार्वभौमिकताको उल्लंघन भनेको छ । अफगान अधिकारीका अनुसार पक्तिका प्रान्तमा एक धार्मिक विद्यालयमा ड्रोन आक्रमण भएको थियो । उता नांगरहारमा पनि आक्रमण गरिएको छ ।

पाकिस्तानको दाबी र माग

पाकिस्तानले आतंकवादी ठेगानामा मात्र आक्रमण गरिएको बताएको छ । इस्लामाबादले लामो समयदेखि तालिबान सरकारसँग अफगान भूमिलाई कुनै पनि आतंकी समूहले प्रयोग गर्न नदिन माग गर्दै आएको छ । पाकिस्तानले टीटीपी अफगानिस्तानबाट सञ्चालन भइरहेको आरोप लगाएको छ, तर तालिबानले यसलाई अस्वीकार गर्दै आएको छ ।

पाकिस्तानले सन् २०२० मा अमेरिका र तालिबानबीच कतारको दोहामा भएको दोहा सम्झौता अनुसार तालिबानमाथि अन्तर्राष्ट्रिय समुदायले दबाब दिनुपर्ने माग गरेको छ । उक्त सम्झौता २९ फेब्रुअरी २०२० मा हस्ताक्षर भएको थियो, जसले अमेरिकी फौज फिर्ता गर्ने मार्ग प्रशस्त गरेको थियो । त्यसपछि सन् २०२१ मा अमेरिकी सेना फिर्ता भएपछि तालिबानले काबुल नियन्त्रणमा लिएको थियो ।

पछिल्ला हमलापछि तनाव

एयरस्ट्राइकअघि खैबर पख्तूनख्वाको बन्नू जिल्लामा सुरक्षा गस्तीमाथि आत्मघाती हमला हुँदा दुई सैनिक, जसमा एक लेफ्टिनेन्ट कर्नेल पनि थिए, मारिएका थिए । १६ फेब्रुअरीमा बाजौरमा विस्फोटकले भरिएको गाडी सुरक्षा चौकीमा ठोक्किँदा ११ सैनिक र एक बालकको ज्यान गएको थियो ।

यसअघि इस्लामाबादस्थित एक शिया मस्जिदमा जुमाको नमाजका बेला भएको आत्मघाती आक्रमणमा ३१ जनाको मृत्यु र १६९ जना घाइते भएको डनले जनाएको थियो । उक्त हमलाको जिम्मा इस्लामिक स्टेटले लिएको थियो ।

टीटीपी : पाकिस्तानका लागि ठूलो खतरा

सन् २०२१ मा अफगानिस्तानमा तालिबान सत्तामा आएपछि टीटीपीले पाकिस्तानी सुरक्षाबलविरुद्ध गुरिल्ला युद्ध तीव्र पारेको छ । पाकिस्तानले टीटीपीका लडाकुहरू अफगानिस्तानमा तालिम लिएर सीमा पार गरी आक्रमण गर्दै आएको आरोप लगाएको छ । तालिबानले भने टीटीपी लाई समर्थन नगरेको दाबी गर्दै आएको छ ।

सन् २००७ मा बैतुल्लाह मेहसूदको नेतृत्वमा टीटीपी गठन भएको थियो । यसको उद्देश्य पाकिस्तानी राज्यविरुद्ध लड्नु र शरिया कानुन लागू गर्नु रहेको बताइन्छ । पाकिस्तान इन्स्टिच्युट फर पिस स्टडीजका अनुसार पछिल्ला वर्षमा पाकिस्तानमा आतंकवादी आक्रमण उल्लेख्य रूपमा बढेका छन्, जसका लागि टीटीपी लाई मुख्य कारण मानिएको छ । अक्टोबरमा सीमा क्षेत्रमा भएका झडपपछि दुवै देशबीच तनाव चर्किएको छ । कतारको मध्यस्थतामा अस्थायी युद्धविराम भए पनि स्थायी सहमति हुन सकेको छैन ।