अखबार नेपाल ट्रेन्डिङ

काठमाडौं: जर्मनीको ह्याम्बर्गमा भएको बन्दुक आक्रमणमा कैयौँ मानिसको मृत्यु भएको छ । ‘जहोभस विटनेस’ इसाई अभियानकर्मीहरूको बैठक कक्षमा गोली चलेको हो ।

गोली चलाउनेको पनि मृत्यु भएको हुनसक्ने प्रहरीले अनुमान गरेको छ । ७ जनाको मृत्यु भएको र ती मृतकमध्येमा बन्दुकधारी पनि रहे वा नरहेको प्रष्ट भइनसकेको जर्मन सञ्चार माध्यमहरुले जनाएका छन् ।

ह्याम्बर्गकै अर्को स्थान ग्रस ब्रोस्टलमा भएको गोली प्रहारमा पनि केही मानिसहरू घाइते भएका छन् । घटनामा घाइते भएकाहरूलाई अस्पताल लगिएको बताइएपनि घाइतेहरूको सङ्ख्या र उनीहरूको अवस्थाबारे विवरण सार्वजनिक भएका छैनन् ।

स्थानीयले राति नौ बजे चर्चमा गोली चलेको प्रहरीलाई जानकारी दिएका थिए । प्रहरीले कारबाही गरिरहेको जनाएको छ । कारबाही नसकिएसम्म घरबाट बाहिर ननिस्किन समेत आग्रह गरेको छ ।

ह्याम्बर्गका आन्तरिक मामिला मन्त्री एन्डी ग्रोटले ट्विट गर्दै प्रहरीको विशेष फौज र ठूलो सङ्ख्यामा अधिकारीहरू घटनास्थलमा परिचालन गरिएको बताएका छन् । प्रहरीले सर्वसाधारणलाई घटनाको अनुमानबारे सार्वजनिक अभिव्यक्ति नदिन र हल्ला नफैलाउन अपिल गरेको छ ।

‘जहोभस विटनेसेस’ इसाई धार्मिक अभियानकर्मीहरू हुन् । न्यूयोर्कमा मुख्यालय रहेको यो अभियानको स्थापना १९औँ शताब्दीको अन्त्यतिर अमेरिकामा भएको थियो ।