अखबार नेपाल ट्रेन्डिङ

काठमाडौं: नुवाकोटको खानीगाउँस्थित श्री चण्डेश्वरी संरक्षण समिति मगर समाज उपभोक्त समितिद्वारा मगर समुदायको लोपोन्मुख परम्परागत संस्कृतिक संरक्षणको निम्ति घाँटु नाच देखाईनुको साथै वृहत सांस्कृतिक कार्यक्रम २०८१ को आयोजना हुने भएको छ ।

कार्यक्रमको तिब्र तयारी सम्पन्न भएको श्री चण्डेश्वरी संरक्षण समिति मगर समाजका अध्यक्ष सुनिल थापामगरले जानकारी दिए । लिखु गाउँपालिकाको अध्यक्ष ध्रुव श्रेष्ठको प्रमुख आतिथ्यमा सम्पन्न हुने कार्यक्रममा मगर समुदायको घाँटु नाचको वित्तचित्र पनि प्रदर्शन गरिने समाजका अध्यक्ष सुनिलले जानकारी गराए ।

विशेषगरी लिखु गाउँपालिकाको साँस्कृति र पर्यटकीयको हिसावले पनि यो गाउँपालिकामा स्रोत साधनको उचित रुपमा परिचालन हुन नसक्दा यहाँका साँस्कृति र पर्यटन प्रवर्द्धनका लागि पनि परिचित हुन नसकेको अवस्था छ । यस गाउँपालिकामा कला, साहित्य र साँस्कृति भएपनि सूचना प्रविधिको पहुँच र विकासमा अझै पछाडि नै परेको छ । तसर्थ यस पृष्ठभूमिलाई समेट्दै गाउँपालिकाको वडा नम्बर १ मा रहेको खानीगाउँमा मनाईने मगर समुदायको लोपोन्मुख घाँटु नाचलाई संरक्षण र जगेर्ना गर्नका निम्ति प्रदर्शित वित्तचित्रले थप टेवा पुर्याउनेमा विश्वस्त रहेको समाजका अध्यक्ष सुनिलले बताए ।

वृहत सांस्कृतिक कार्यक्रमका लागि नेपालका चर्चित कलाकार तथा स्थानीय कलाकारको पनि बेजोड प्रस्तुति रहने छ । कार्यक्रमको आकर्षकमा हाँस्य कलाकार तथा जादुगर शेर बहादुर गुरुङको विशेष प्रस्तुति रहनेछ भने भ्वाइस अफ नेपालका गायक सुनिल थापामगर, गायक रोशन बालुवाका साथै योगेश रानाको प्रस्तुती रहनेछ । त्यसका अलवा कलाकारहरु राजु थापा मगर, रिना पुन, रुपक सिम्खडा, श्रीकृष्ण थापा, अनिसा गिरी, सिता घिमिरे लगायतका स्थानीय कलाकारहरुको बेजोड प्रस्तुती रहने आयोजकले जानकारी दिएको छ ।

लिखु गाउँपालिकाको ६ वटै वडाका वडा अध्यक्षहरुको आतिथ्यमा सम्पन्न हुने कार्यक्रममा कार्यक्रमको उदघोषण भने गायक रमेश श्रेष्ठ ‘मेलोडि’ले गर्नेभएका छन् । कार्यक्रमका निम्ति भनेर देश विदेशमा रहेका विभिन्न संघ संस्था, समाजसेवी, व्यवसायि र व्यक्तिले आर्थिक सहयोग गरेको समाजका अध्यक्ष सुनिल थापामगरले जानकारी दिए ।