अखबार नेपाल ट्रेन्डिङ

काठमाडौं: यस वर्षको धर्मराज-सावित्री थापा लोक संस्कृति साहित्य पुरस्कार नेपाली साहित्य र लोक संस्कृतिको श्रीबृद्धिमा निरन्तर समर्पित भई राष्ट्रिय क्षेत्रमा विभिन्न माध्यमबाट विशेष योगदान गरेवापत संस्कृतिविद्-साहित्यकार तेजेश्वरबाबु ग्वंग र धर्मराज-सावित्री थापा लोकगीत-संगीत पुरस्कार नेपालको लोकगीत-संगीतको श्रीबृद्धिमा विगत ४० वर्षदेखि निरन्तर समर्पित बमबहादुर कार्की र शिवा आलेलाई संयुक्त रुपमा समर्पण गर्ने निर्णय भएको छ ।

जनकविकेशरी धर्मराज थापाको वार्षिक स्मृतिसभा एवं पुरस्कार समर्पण कार्यक्रम प्रत्येक वर्ष नियमित रुपमा सञ्चालन हुँदै आएको छ । यस वर्ष पनि २०८० साल साउन १ गतेबाट शतवार्षिकीको रुपमा पुरस्कार समर्पणसहित विभिन्न साहित्यिक कार्यक्रम आयोजना गरी जनकविकेशरी धर्मराज थापाको वार्षिक स्मृतिसभा र जन्मजयन्ती मनाउने निर्णय भएको बताइएको छ ।

जनकविकेशरी धर्मराज-सावित्री थापा प्रतिष्ठानका अध्यक्ष मदनराज थापाको अध्यक्षतामा बसेको बैठकले नगद र सम्मानपत्र सहितको धर्मराज-सावित्री थापा लोक संस्कृति साहित्य पुरस्कार र लोकगीत-संगीत पुरस्कार २०८० साल साउन १ गते विशेष समारोहको आयोजना गरी समर्पण गर्ने निर्णय गरेको जानकारी साहित्यकार दुर्गाकिरण तिवारीले दिनुभयो ।

स्मरणीय छ, नेपाली लोक संस्कृति, साहित्य, लोकगीत-संगीत, कला, भाषाका विधामा आफूलाई समर्पित गर्ने अनवरत साधनारत विशिष्ठ साधक-सर्जकहरुलाई उनीहरुको योगदानको उच्च मूल्यांकन गर्दै पुरस्कार सम्मानपत्र सहित जनकविकेशरी धर्मराज-सावित्री थापा प्रतिष्ठानले प्रत्येक वर्ष पुरस्कृत र सम्मानित गर्ने गरेको छ ।