अखबार नेपाल ट्रेन्डिङ

काठमाडौं: सेयर बजारमा दोहोरो अंकको गिरावट आएको छ । साताको पहिलो कारोबार दिन आइतबारदेखि ओरालो लागेको नेप्से परिसूचक मंगलबार पनि सोही क्रमलाई निरन्तरता दिएको हो । यस दिन नेप्से परिसूचक १९.०६ अंकले घटेर १८८९.५९ विन्दुमा झरेको छ ।

यो पछिल्लो ४ महिना यताकै न्यून विन्दु हो । यसअघि गत वैशाख १९ गते नेप्से परिसूचक १८६६ विन्दुमा झरेको थियो । यस दिन सेन्सेटिभ इण्डेक्स ३.४५ अंकले घटेर ३६१.३१ विन्दुमा बन्द भएको छ । नेप्से घटेपनि यसदिन कारोबार रकम अघिल्लो दिनको तुलनामा सामान्य बढेको  छ । आज २८२ स्क्रीप्टको ४२ लाख ८७ हजार ४२४ कित्ता सेयर १ अर्ब २८ करोड ३१ लाख ८२ हजार १४५ रुपैयाँमा किनबेच भए ।  सोमबार १ अर्ब १७ करोडको सेयर कारोबार भएको थियो ।

मंगलबार १९३ स्क्रीप्टको मूल्य घट्दा ३१ स्क्रीप्टको मात्रै बढेको हो । नेप्से घटेको दिन सबैभन्दा बढी अपर लोहोरे खोला हाइड्रोपावरका लगानीकर्ता कमाए । यो हाइड्रोपावरको ५.८६ प्रतिशतले सेयर मूल्य बढ्यो । बराही हाइड्रोपावरको सेयर मूल्य भने ७.६४ प्रतिशतले ओरालो लाग्यो ।

कारोबार रकमका आधारमा सानिमा जनरल इन्स्योरेन्स शीर्ष स्थानमा रह्यो । सो कम्पनीको २ अर्ब ३७ लाख  ८४ हजार ९९१ रुपैयाँको सेयर कारोबार भयो । नबिल बैंकको ३४ करोड, एनआईसी एसिया बैंकको ३० करोड, शिवम् सिमेन्टको २६ करोड र सिटीजन्स लाइफ इन्स्योरेन्सको २६ करोड मूल्यको सेयर कारोबार गरी शीर्ष पाँचमा पर्न सफल भए ।

कारोबारमा आएका १३ वटै उपसमूहको परिसूचक घट्यो । जसमध्ये जलविद्युत उपसमूहको परिसूचक सर्वाधिक १.७९ प्रतिशतले घटेको हो ।