अखबार नेपाल ट्रेन्डिङ

काठमाडौं: लक्ष्मी बैंक र सनराइज बैंक लिमिटेडले मर्जर प्रक्रिया पुरा गरी आजदेखि एकीकृत कारोबार सुरू गरेका छन् । यी दुई बैंकबीच गत जेठ ८ गते मर्जरका लागि अन्तिम सम्झौता भएको थियो ।

दुबै बैंकको असार ३ गते सम्पन्न साधारण सभाले मर्जर सम्बन्धि प्रस्ताव पारित गरेको थियो भने नेपाल राष्ट्र बैंकले असार २२ गते अन्तिम स्वीकृति प्रदान गरेको थियो ।

कम्पनी रजिष्ट्रारको कार्यालयबाट असार २४ गते अन्तिम स्वीकृति प्राप्त भएको हो भने नेपाल धितोपत्र बोर्डले समेत असार २५ गते पूर्व स्वीकृति प्रदान गरिसकेको छ । यी सबै प्रक्रिया सम्पन्न भएसँगै दुबै बैंक एक भएका हुन् ।

दुई बैंक एक भई लक्ष्मी सनराइज बैंक लिमिटेडको नामबाट एकीकृत कारोबार सुरू गरेको जानकारी बैंकले दिएको छ । मर्जर पश्चात् बैंकको केन्द्रिय कार्यालय हात्तीसार, काठमाडौंमा रहनेछ ।

एकीकृत कारोबार सुरू गर्न डाटा माइग्रेसन लगायतका प्रयोजनका लागि दुबै बैंकको असार २७ गतेदेखि २८ गतेसम्म सबै शाखा कार्यालयबाट प्रदान हुने सेवा रोकिएको थियो ।

हाल लक्ष्मी बैंकको चुक्तापूँजी ११ अर्ब ५५ करोड रुपयाँ भन्दा बढी छ भने सनराइज बैंकको १० अर्ब ११ करोड रुपयाँ भन्दा बढी छ । दुई बैंक एक भएपछि चुक्तापूँजी २१ अर्ब ६६ करोड रुपयाँ भन्दा बढी भएको छ ।

मर्जर तथा प्राप्ति सम्बन्धि पछिल्लो व्यवस्था बमोजिम मर्जर तथा प्राप्ति प्रक्रिया पुरा गरी एकीकृत कारोबार सुरू गरेको दिनदेखि बढीमा १५ कारोबार दिन शेयर कारोबार बन्द गर्नुपर्ने व्यवस्था रहेको छ ।

यस अघिको व्यवस्थामा भने मर्जर तथा प्राप्तिका लागि प्रारम्भिक सम्झौता गरेको भोलिपल्टदेखि मर्जर प्रक्रिया पुरा भई धितोपत्र बजारमा शेयर सूचीकृत नभएसम्म शेयर कारोबार बन्द हुने व्यवस्था थियो ।