अखबार नेपाल ट्रेन्डिङ

काठमाडौं: सेञ्चुरी कमर्शियल बैंकले गत आर्थिक वर्ष २०७६/७७ को लाभांश घोषणा गरेको छ । बैंकले गत आर्थिक वर्षको मुनाफाबाट सेयरधनीलाई ७.५० प्रतिशत लाभांश वितरण गर्ने घोषणा गरेको हो ।

बैंकको मंसिर २९ गते बसेको सञ्चालक समितिको ३२६ औं बैठकले आफ्ना सेयरधनीहरुलाई ५.२५ प्रतिशत बोनस सेयर तथा २.२५ प्रतिशत नगद लाभांश (करसहित) गरी कुल ७.५० प्रतिशतको लाभांश वितरण गर्ने प्रस्ताव गरेको हो ।

बैंकको हालको चुक्ता पुँजी ८ अर्ब ४१ करोड रुपैयाँ रहेको छ । ५.२५ प्रतिशत बोनसपछि बैंकको चुक्ता पुँजी ८ अर्ब ८६ करोड रुपैयाँ नाघ्ने छ । नेपाल राष्ट्र बैंकबाट स्वीकृति तथा साधारण सभाबाट पारित भए पश्चात उक्त लाभांश वितरण गरिने छ ।

बैंकले अघिल्लो आर्थिक वर्ष २०७५/७६ नाफाबाट सेयरधनीलाई ६.७५ प्रतिशत लाभांश (२ प्रतिशत बोनस र ४.७५ प्रतिशत नगद) र आर्थिक वर्ष २०७४/७५ को नाफाबाट ६.५ प्रतिशत लाभांश (२ प्रतिशत बोनस र ४.५ प्रतिशत नगद) वितरण गरेको थियो । बैंकको प्रस्तावित लाभांश दर गत दुई वर्ष यताकै उच्च हो भने बोनसदर गत तीन वर्ष यताकै उच्च हो ।