अखबार नेपाल ट्रेन्डिङ

काठमाडौं:  नेपाल राष्ट्र बैंकले उपदान तथा पेन्सन कोषमा रहेको एक अर्ब २७ करोड रुपैयाँ मुद्दती निक्षेपमा लगानी गर्ने भएको छ । राष्ट्र बैंकले वाणिज्य बैंक, विकास बैंक र फाइनान्स कम्पनीहरुको मुद्दती निक्षेपमा २७३ दिन अवधिको लागि लगानी गर्ने जनाएको छ ।

राष्ट्र बैंकले वाणिज्य बैंकमा एक अर्ब एक करोड ६० लाख रुपैयाँ, विकास बैंकहरुमा १९ करोड ५ लाख रुपैयाँ र वित्त कम्पनीहरुमा ६ करोड ३५ लाख रुपैयाँ गरी कूल १ अर्ब २७ करोड रुपैयाँ लगानी गर्न लागेको हो । बैंकले उक्त रकम २०७७ कात्तिक २ गतेदेखि २०७८ साउन ३२ गतेसम्म २ सय ७३ दिनका लागि मुद्दती निक्षेप राख्न लागेको हो ।

निक्षेप लिन चाहन ईच्छुक बैंक तथा वित्तीय संस्थाहरुले आफुले लिन चाहेको रकम तथा उक्त रकममा प्रदान गर्ने ब्याजदर समेत उल्लेख गरी कात्तिक १७ गते ३:३० बजेभित्र शिलबन्दी प्रस्ताव पेश गनुपर्ने छ । राष्ट्र बैंकको आह्वान गरेको निक्षेपका लागि बैंक तथा वित्तीय संस्था संचालनमा आएको कम्तीमा २ वर्ष पूरा भएको र न्यूनतम पूँजीकोष कायम हुनुपर्ने जनाएको छ ।

निक्षेप लिनको लागि निष्कृय कर्जा कुल कर्जा सापटीको ५ प्रतिशत भन्दा कम हुनुपर्ने, कर्जा र स्वदेशी निक्षेप र प्राथमिक पूँजी अनुपात बैंकले समय समयमा निर्धारण गरेको सीमा भित्र रहेको हुनुपर्ने छ । त्यस्तै, ईच्छुक बैंक तथा कम्पनीहरुको हकमा निकटतम अघिल्लो वर्षमा नाफामा रहेको र रियलस्टेट कर्जा तोकिएको सीमाभन्दा बढी नभएको हुनुपर्ने राष्ट्र बैंकले जनाएको छ ।