अखबार नेपाल ट्रेन्डिङ

काठमाडौं: पहिलो संविधानसभाको निर्वाचनको पूर्वसन्ध्यामा जिउदै मान्छेलाई ईट्टाभट्टामा हालेर जलाएको अभियोग लागेका महोम्मद अफ्ताब आलमको मुद्धाको सुनुवाई आज हुँदैछ ।

लामो समयदेखि स्थगित हुँदै आएको मुद्धाको आज सुनवाई हुन लागेको हो  । आज आलमको मुद्धा ७ नम्बरको संयुक्त बेञ्चको पहिलो नम्बरमै राखेर सुनुवाई हुँदैछ ।

२०६४ फागुन २७ गते  रौतहटजिल्लाको राजपुर हत्याकाण्डको रुपमा चर्चित उक्त घटनामा आलमले जिउदै मान्छेलाई ईट्टा भट्टाममा हालेर जलाउने काम गरेका थिए  ।

बम बनाउने क्रममा विस्फोट हुँदा घाइते भएका आठ जनालाई नजिकैको इँटाभट्टामा जलाएको अभियोगमा रौतहट जिल्ला अदालतका साथै उच्च अदालतले समेत आलमलाई पुर्पक्षका लागि थुनामा राख्न आदेश दिएको थियो ।

तर उनको पछिल्लो मुद्दा लामो समयदेखि स्थगित हुँदै आएको थियो । यसअघि आलमको मुद्दाको पेसी कहिले हेर्न नमिल्ने र कहिले हेर्न नभ्याइनेमा पर्दै आएको थियो ।

७३ नम्बरको थुनुवाबाटै उनले आफूलाई थुनामा पठाउने रौतहट जिल्ला, वीरगञ्ज उच्च अदालतको आदेश खारेजीको माग गर्दै निवेदन दर्ज गरेका हुन् ।

आलमले पहिलो संविधानसभा निर्वाचनको समयमा रौतहटको राजपुरमा भएको बम विष्फोटनमा संलग्न २० जनाभन्दा धेरैलाई इँटाभट्टामा हालेर ज्यान लिएका थिए ।