अखबार नेपाल ट्रेन्डिङ

काठमाडौं: नेपाल आयल निगमले प्रतिदिन एक लाख सिलिण्डर ग्यास नेपाल भित्रिरहेकाले लाइन बस्नु पर्ने अवस्था नआउने बताएको छ । कोरोना भाइरसको संक्रमणले विश्व आक्रान्त बनिरहेका बेला डिजेल, पेट्रोल र ग्यासलगायत दैनिक उपभोग्य वस्तुको अभाव हुने भन्दै उपभोक्ता आतंकित बनेका बेला निगमले यस्तो बताएको हो ।

निगमका कार्यकारी निर्देशक सुरेन्द्रकुमार पौडेलले आइतबार रक्सौल नाकाबाट मात्रै ८६ बुलेट ग्यास भन्सार पास भएर नेपाल आउने क्रममा रहेको उल्लेख गर्दै काठमाडौं उपत्यकामा ३८ वटा बुलेट आउने बताए । रक्सौलबाट ८६ बुलेट भन्सार पास भएर १२ सय ८५ लिटर अर्थात १ लाख सिलिण्डर काठमाडौंका लागि ३८ र बाहिरका लागि ४८ वटा बुलेट भित्रिएको पौडेलले बताए ।

निर्देशक पौडेलले फागुन २८ र २९ गते ३ सय १ बुलेट अर्थात् ३ लाख ७५ हजार सिलिण्डर नेपाल भित्रिएको बताए । ग्यासको भण्डारण नभएका कारण माग बढी हुनेबित्तिकै केही समस्या देखिने भए पनि अभाव नै नहुने उनको भनाइ छ । विपदको समयमा बजारमा कृत्रिम अभावका घटनाहरू हुने गरेको उनले स्वीकार गरे ।