अखबार नेपाल ट्रेन्डिङ

काठमाडौं: राष्ट्रियसभाको नवनिर्वाचित १८ जना सांसदले आज सपथ लिएर कार्यकाल सुरु गर्दै छन् । रिक्त हुन लागेका एक तिहाई सांसदका लागि एक महिना अघि माघ ९ गते नै निर्वाचन भएको थियो । निर्वाचनमा नेकपाका १६ र राजपाका दुई सांसद निर्वाचित भएका थिए । कांग्रेसले भने एक सिट पनि जित्न सकेन ।

नेकपाबाट निर्वाचित गोपी अछामी, इन्दिरा गौतम, देवेन्द्र दाहाल, तुलसाकुमारी दाहाल, राधेश्याम पासवान, गंगाकुमारी वेल्वासे, वेदुराम भुषाल, भगवती न्यौपाने, नारायणकाजी श्रेष्ठ, गोपाल भट्टराई, बिमला घिमिरे, जगप्रसाद शर्मा, मायाप्रसाद शर्मा, सुमित्रा विसी, शारदा देवी भट्ट र तारामान स्वारले आज सपथ लिँदैछन् । नेकपासँग चुनावी तालमेलबाट दुई सिट जितेको राजपाका शेखरकुमार सिंह र मृगेन्द्रकुमार सिंह यादवको कार्यकाल पनि आजबाट सुरु हुनेछ । नवनिर्वाचित सांसदको कार्यकाल भने ६ वर्षकै हुनेछ । प्रत्येक २ वर्षमा एक तिहाई सांसदको कार्यकाल समाप्त हुने संवैधानिक व्यवस्था छ ।

यसैबीच राष्ट्रियसभाबाट विदाई हुँदै गर्दा सांसदहरुले प्रभावकारी ढंगले भूमिका निर्वाह गर्न शुभकामना दिएका छन् । राष्ट्रियसभामा दुई बर्षे कार्यकाल सकिएर बिदाइ लिनुअघि बैठकमा बोलेका उनीहरुले सरकारलाई थप जिम्मेवार बन्दै जनताको सवालमा खरो उत्रिन, भ्रष्टाचार न्यूनीकरण गरि शुसासन कायम गर्न तथा समग्र रुपमा जनताको सवाललाई आत्मसाथ गर्न आग्रह समेत गरे ।

मंगलबारदेखि बिदा हुने राष्ट्रियसभा सदस्यहरुमा नेकपाबाट ८, नेपाली कांग्रेसका ७, राजपाका २, समाजवादी पार्टी नेपालका १ र राष्ट्रपतिबाट मनोनित एक जना गरी १९ रहेका छन् । राष्ट्रपतिबाट राष्ट्रियसभा सदस्यमा मनोनित अर्थमन्त्री डाक्टर युवराज खतिवडाको कार्यकाल पनि मंगलबारदेखि नै सकिएको छ ।