अखबार नेपाल ट्रेन्डिङ

काठमाडौं: चीनमा थप ४२ जनाको ज्यान गएपछि कोरोनाभाइरस संक्रमणका कारण विश्वभर मृत्यु हुने मानिसको संख्या तीन हजार नाघेको छ । ‘कोभिड-१९’ का कारण चीनमा मात्र यस भाइरसका कारण २ हजार ९ सय १२ को मृत्यु भएको त्यहाँको राष्ट्रिय स्वास्थ्य विभागले जानकारी दिएको छ ।

उक्त भाइरस गत डिसेम्बर महिना त्यहाँबाट फैलिन थालेको थियो । चीन बाहेक अन्य १० देशमा पनि मानिसहरूको मृत्यु भएको छ । इरानमा अहिलेसम्म ५० जनाको मृत्यु भएको पुष्टि भएको छ । इटलीमा पनि ३० जनाभन्दा बढी मानिसको ज्यान गइसकेको छ । इटलीमा ४८ घण्टामा सङ्क्रमित मानिसको दर दोब्बर भएको त्यहाँको स्वास्थ्यसम्बन्धी निकायले जनाएको छ । त्यहाँ कम्तीमा ३४ जनाको मृत्यु तथा करिब १७ सय जनामा संक्रमण भएको पुष्टि भएको छ ।

विश्वभरि झन्डै ९० हजार जनामा संक्रमण भएको पुष्टि भएको छ । अहिले चीनमा संक्रमणको दर घटेको भए पनि अन्यत्र ह्वात्तै बढेको छ । तर संक्रमण भएका अधिकांश मानिसमा सामान्य लक्षण देखिएको विश्व स्वास्थ्य सङ्गठनले जनाएको छ । कोरोना भाइरस सङ्क्रमण भएका दुईदेखि पाँच प्रतिशत बिरामीको मृत्यु हुन सक्ने उसको भनाइ छ ।

बेलायतमा ३६ जनामा सङ्क्रमण भएको पुष्टि भएपछि प्रधानमन्त्री बोरिस जोनसनले सोमबार आपत्कालीन बैठक बोलाएको छ । चीनपछि सर्वाधिक संक्रमण देखिएको दक्षिण कोरियामा थप पाँच सय जना सङ्क्रमित भेटिएका छन् । त्यहाँ ४ हजार २ सय १२ मा सङ्क्रमण भएको सरकारी तथ्यांक रहेको समाचारमा जनाइएको छ ।