अखबार नेपाल ट्रेन्डिङ

एजेन्सीः साविक विजेता पेरिस सेन्ट जर्मेन (पीएसजी) ले नान्टेसमाथि जित हात पारेको छ । पीएसजीले घरेलु टोली नान्टेसलाई २–१ ले पराजित गर्दै उपाधि यात्रालाई थप मजवुत बनाएको हो । जितसँगै पीएसजीले फ्रेन्च लिग वानको शीर्षस्थानमा १५ अंकको अग्रता बनाएको छ । पीएसजीको २३ खेलबाट ५८ अंक पुगेको छ ।

एक खेल कम खेलेको दोस्रो स्थानको मार्सेलीको ४३ अंक छ । नान्टेस ३२ अंक जोडेर १०औं स्थानमा छ । पीएसजीको यो लगातार सातौ जित हो । लिगमा भने पीएसजीको यो लगातार पाँचौ जित हो । मोनाकोसँग ३–३ गोलको बराबरीमा रोकिएयता, पीएसजी अपराजित छ । लिगमा अब १५ खेल खेल्न बाँकी छ । पीएसजीको जितमा मोउरो इकार्डी र थिलो केररले गोल गरे । घरेलु टोलीका मोसेस सिमोनले सान्त्वना गोल फर्काए । २९औं मिनेटमा इकार्डीको गोलबाट पीएसजीले खेलमा अग्रता बनाएको थियो ।

इकार्डीले एन्जल डि मारियाको पासमा गोल गर्न सफल भयो । ५७औं मिनेटमा एन्जल डि मारियाकै पासमा थिलो केररले गोल गर्दै पीएसजीको अग्रता दोब्बर पारे । त्यसपछि थप गोल निस्कन नसक्दा पीएसजी २–१ ले विजयी हुन सफल भयो ।