अखबार नेपाल ट्रेन्डिङ

एजेन्सीः चीनमा भेटिएको रहस्यमयी कोरोना भाइरस नाम दिइएको रोगबाट मृत्यु हुनेको संख्या ९ पुगेको छ । कोरोना भाइरस अझै फैलन सक्ने चिनियाँ अधिकारीहरुले चेतावनी दिएका छन् । उनीहरुका अनुसार चीनमा सो भाइरसबाट ४ सय ४० जनालाई संक्रमण भएको बताएको छ ।

नेशनल हेल्थ कमिसनका अधिकारीहरुले चीन अहिले सो भाइरसबाट जोगिन र नियन्त्रणका लागि गम्भीर अवस्थामा रहेको समेत जनाएका छन् । चीनका अधिकारीहरुले सो भाइरस मानवबाट मानवमा फैलिइरहेको मात्रै पत्ता लगाएका छन् । तर, सो संक्रमणको वास्तविक कारण के हो भन्ने बारेमा चीनले अझै पनि पत्ता लगाइनसकेको जनाइएको छ । चीनको राष्ट्रिय स्वास्थ्य आयोगका उपमन्त्री ली बीनले आज पत्रकार सम्मेलनमा सो भाइरसको संक्रमणको कारण र रुट अझै पूर्ण रुपमा जानकारी नभएको बताएका थिए ।

यसैबीच कोरोना भाइरसको सङ्क्रमण अमेरिकामा पनि देखिएको छ । अमेरिकाले सिएटल शहरमा कोरोना भाइरससँग सम्बन्धित पहिलो घटना दर्ता भएको जनाएको छ । विश्व स्वास्थ्य सङ्गठनले यो विषयलाई गम्भीर मान्दै आपतकालीन बैठक बोलाएको छ । अमेरिकी स्वास्थ्य अधिकारीहरुले मङ्गलबार चीनमा फैलिएको नयाँ भाइरससँग जोडिएको एउटा घटना सार्वजनिक भएको जनाएका थिए । यसअघि जापान, थाइल्याण्ड र दक्षिण कोरियामा पनि यो भाइरसको सङ्क्रमण देखिएको अधिकारीले जनाएका थिए ।