अखबार नेपाल ट्रेन्डिङ

काठमाडौं: नेपालमा सक्रिय पश्चिमी वायुको प्रभाव आजबाट सकिएको छ । हाल नेपालमा उल्लेखनीय मौसमी प्रणाली नरहेको जल तथा मौसम पूर्वानुमान महाशाखाले जनाएको छ । काठमाडौं उपत्यकाको तापक्रम आज घटेको महाशाखाले जनाएको छ ।

हिजो न्यूनतम तापक्रम २ दशमलब ७ डिग्री सेल्सीयस रहेकोमा आज बिहान भने १ दशमलब ६ डिग्री सेल्सीयसमा झरेको छ । देशको तराई भूभागका अधिकांश स्थान लगायत पहाडी भूभागका केही स्थानमा हुस्सु र कुहिरो लागेको महाशाखाले उल्लेख गरेको छ ।

आज दिउँसो मौसम सामान्यतया सफा रहने र तराईका भूभागमा भने हुस्सु र कुहिरो रहने जनाइएको छ । भोलि र पर्सि शुक्रबार पनि मौसम देशैभर सामान्यतया सफा रहने जनाइएको छ । तर, तराई क्षेत्रमा हुस्सु र कुहिरोको प्रभाव रहने पूर्वानुमान महाशाखाले जनाएको छ । तराईका अधिकांश भूभागमा हुस्सु र कुहिरो रहने र ती स्थानमा घाम राम्रोसँग नलाग्ने भएकोले चिसोबाट बच्ने उपाय अपनाउन पूर्वानुमान महाशाखाले आग्रह गरेको छ ।