अखबार नेपाल ट्रेन्डिङ

काठमाडौं: द्वन्द्वकालीन घटनाका मुद्दालाई टुंगोमा पुर्यासउन सत्तारुढ दल नेपाल कम्युनिस्ट पार्टी (नेकपा) र प्रमुख प्रतिपक्षी दल नेपाली कांग्रेस छलफलमा जुटेका छन् । नेपालमा भएको १० वर्षे सशस्त्रद्वन्द्वका क्रममा मारिएका, बेपत्ता भएका तथा अंगभंग भएका व्यक्तिलाई न्याय दिन र त्यससँग सम्बन्धित मुद्धा टुंग्याउन प्रधानमन्त्री समेत रहेका नेकपाका अध्यक्ष केपी शर्मा, अर्का पुष्पकमल दाहाल र प्रमुख प्रतिपक्षी दल नेपाली कांग्रेसका सभापति शेरबहादुरबीच छलफल हुँदैछ ।

शीर्ष तीन नेताबीचको छलफलमा द्वन्द्वकालीन घटनाका विषय टुंग्याउने गरी सत्य निरुपण तथा बेपत्ता आयोगबारे बनेको विधेयकलाई अघि बढाउने विषयमा छलफल हुनेछ । १० वर्षे द्वन्द्वकालका बेला भएका घटनामा तत्कालीन बिद्रोहीको नेतृत्व गरेका पुष्पकमल दाहाल, सरकारमा रहेका शेरबहादुर देउवा तथा नेपाली कांग्रेस नेतृत्व, सुरक्षा निकाय तथा प्रशासन घटनाको जिम्मेवार हुनुपर्ने माग उठ्ने गरेको छ ।

द्वन्द्व पीडितले लामो समयसम्म न्याय नपाएको गुनासो गर्दै गर्दा सरकारले यी विषय टुंग्याउने गृहकार्यमा लागेको हो । सत्यनिरुपण तथा बेपत्ता आयोगका लागि सरकारले विधेयक ल्याएपनि अध्यक्ष को नियुक्ति हुने भन्ने टुंगो लागेको छैन् । दलहरुबीच नै कुरा नमिल्दा आयोगको नेतृत्व कसले पाउने भन्ने टुंगोमा पुग्न सकेको छैन ।