अखबार नेपाल ट्रेन्डिङ

दार्चुला: दार्चुला तींकर सडक खण्डको राताकाठामा जीप दुर्घटना हुदा ११ जनाको मृत्यु भएको छ भने जीपका चालक गम्भीर घाईते भएका छन ।

जिल्ला प्रहरी कार्यालय दार्चुलाका निमित्त प्रमुख प्रहरी निरिक्षक रविन्द्र कठायतकाअनुसार सदरमुकामबाट हिकिलाका लागि छुटेको म १ ज २८० नम्बरको जीप दुहु गाउँपालिका-३ राताकाठाको भीरमा खसेर दुर्घटना भएको हो ।

हिजो साँझ सवा ८ बजेतिर खसेको जीपमा सवार मध्ये ११ जनाको मृत्यु भएको र चालक दिपकसिंह धामी गम्भीर घाईते अवस्थामा उद्दार गरिएको प्रहरीले जानकारी दिएको छ । तीन जना महिलाको शव सडकमा निकालिसकिएको, चार जना महिला, तीन जना पुरुष र एक जना बालकको शव भीरमा देखिएको प्रहरीले जानकारी दिएको छ ।

प्रहरी निरिक्षक कठायतका अनुसार चार जना महिलाबाहेक अन्यको शव निकाल्न सकिने अवस्था नरहेकाले आज बिहान मात्र निकालिने बताउनुभयो । ‘रातको समयमा भीरमा गएर शव निकाल्न सक्ने अवस्था नभएकोले आज बिहानमात्र निकालिने प्रहरी निरिक्षक खडकाले बताउनुभयो । गम्भीर अवस्थामा भेटिएका चालक धामीलाई भने जिल्ला अस्पताल दार्चुलाबाट भारतको पिथौरागढका लागि रेफर गरिएको प्रहरीले जनाएको छ ।

उद्धारका लागि जिल्ला प्रहरी कार्यालय दार्चुला र सीमा सुरक्षा गुल्म दार्चुलाको टोली घटनास्थल पुगेपनि रातको समय भएकाले भीरमा पस्न सकेको छैन । एक दशकदेखि निर्माणाधीन राताकाठामा प्रशाशनले एक वर्षदेखि जीप चल्न रोक लगाए पनि दिउसो राताकाठा आसपासमा नेपाल प्रहरीको गस्ती हुने गरेकाले हिकिला, सुनसेरा र ब्याससहितका गाउँ जानका लागि मानिसहरु राती जीप लिएर जाँदै गरेको प्रहरीको भनार्इ छ ।