अखबार नेपाल ट्रेन्डिङ

रामेछापः रामेछाप जिल्लाको उमाकुण्ड गाँउपालिका–६ झगरे खानीमा करोडौको लागानीमा बौद्ध गुम्बा, बिहार शिक्षालयको निर्माण हुने भएको छ । गुम्बा निर्माणकार्यका लागि धर्मगुरु थेण्डुप रिन्पोछेले उ झगरे खानीमा शान्ति, समृद्धि र दिगो विकासका लागि वाङ तथा प्रवचन कार्यक्रमको आयोजना गरी बौद्ध गुम्बा, बिहार र शिक्षालय निर्माण गर्ने घोषणा गरेका छन् ।

कार्यक्रममा गाउँपालिका अध्यक्ष शेर बहादुर सुनुवार, प्रशासकीय अधिकृत इश्वरीप्रसाद सुवेदी र वडा अध्यक्ष कृष्ण बहादुर सुनुवारको उपस्थितिमा कार्यक्रम भएको थियो । उक्त कार्यक्रममा रामेछाप जिल्लाको उत्तरी भेग उमाकुण्ड, गोकुलगंगा र लिखु तामाकोशी गाँउपालिकाका मानिसहरुको सहभागि थिए । कार्यक्रमका लागि राजनितिज्ञ तथा पत्रकार कृष्णबहादुर तामाङ र सामाजिक क्षेत्रमा सक्रिय कर्म छेतेन लामाको पहलमा गुम्बा, बिहार र बौद्ध शिक्षालयको निर्माण हुन लागेको हो ।

कार्यक्रममा धर्मगुरु रिन्पोछेले करिव ४० रोपनी क्षेत्रफलमा भब्य बौद्ध गुम्बा, बिहार, शिक्षालय र प्रवचन दिन आउने रिन्पोछे र धर्मगुरुहरुको लागि बिशिष्ठ र साधरण गरि दुईवटा अतिथि गृहको पनि निर्माण गर्ने घोषणा गरेका छन् । बौद्ध गुम्बा, बिहार र शिक्षालयको निर्माणका लागि गाँउपालिका र वडाका जनप्रतिनिधिहरुले आफुले गर्न सक्ने सबै प्रकारको सहयोग गर्ने प्रतिबद्धता व्यक्त गरेका थिए । गुम्बा निर्माणका लागि गरुडसिंह तमाङले १२ रोपनी जग्गादान गरेका छन भने बाँकी जग्गाको ब्यवस्थापन गाँउपालिका र वडाका जनप्रतिनिधिहरुले उपलब्ध गराई सकेका छन ।

धर्मगुरु थेन्डुप रिन्पोछेले बौद्ध गुम्बा, बिहार र स्कुल निर्माण गर्ने घोषणा गरेकै स्थानमा बौद्ध गुम्बा, बिहार र स्कुल निर्माण भएमा त्यस क्षेत्रमा बौद्ध धर्म र दर्शनको ज्ञान ब्यापक रुपमा फैलने विश्वास लिईएको छ । गुम्बा निर्माणपछि नियमित रुपमा धर्म गुरु र रिन्पोछेहरुबाट बौद्ध धर्म र बौद्ध दर्शनका बारेमा नियमित रुपमा प्रवचनहरु दिइने धर्म गुरु थेन्डुप रिन्पोछे स्वयं उपस्थित भई हरेक ६ महिनामा एक पटक १५ दिनसम्म करिब पाँच हजार जनालई बौद्ध धर्म र दर्शनको बारेमा प्रबचन दिने घोषणा गरेका छन् ।

बौद्ध धर्म दर्शन र ज्ञानको आम जिवनमा कस्तो महत्व छ भन्ने कुराहरु यस ठाउँका बौद्धमार्गीहरुलाई प्रवचनद्वारा सिकाईने र यस गुम्बामा अन्य बिद्यर्थीहरुलाई पठनपाठन गराईने छ । यसका लागि रामेछाप मात्रै नभएर दोलखा, सोलुखुम्बु र ओखलढुंगाका विद्यार्थीले समेत बौद्ध शिक्षलयमा बौद्ध दर्शन अध्ययन गर्न सक्नेछन् ।