अखबार नेपाल ट्रेन्डिङ

काठमाडौं: नेपाल कम्युनिष्ट पार्टीले संसदीय सुनुवाई समितिको आज बस्ने बैठकमा अनिवार्य उपस्थितका लागि आफ्ना सांसदलाई ह्वीप जारी गरेको छ ।

आर्इतबारको बैठक कोरम नपुगेर स्थगित भएपछि नेकपा संसदीय दलले आफ्ना सांसदलाई बैठकमा अनिवार्य उपस्थित हुन ‘हृवीप’ जारी गरेको हो । कोरम नपुगेर बैठकै नबस्ने अवस्था आएपछि सांसदलाई अनिवार्य उपस्थित हुन ह्वीप जारी गरिएको नेकपाले जनाएको छ ।

आजको बैठकमा थारु आयोगको अध्यक्षमा सिफारिस विष्णुप्रसाद चौधरी र मधेसी आयोगका अध्यक्षमा सिफारिस विजयकुमार दत्तको सुनुवाइ र अनुमोदन गर्ने तयारी छ । प्रतिपक्षी दल नेपाली कांग्रेसले संवैधानिक आयोगमा गरिएको सिफारिसको वैधानिकतामा प्रश्न उठाउँदै बैठक बहिष्कार गर्दै आएको छ । नेकपाको बहुमत रहेको १५ सदस्यीय सुनुवाई समितिमा नेकपाका ९ जना सांसद रहेका छन् भने कांग्रेसका ४, संघीय समाजवादी फोरम र राजपाका १-१ जना सांसद सदस्य रहेका छन् ।।