अखबार नेपाल ट्रेन्डिङ

काठमाडौं: प्रधानमन्त्री बालेन्द्र शाह आज १० बजेबाटै सांसदहरूसँगको छलफलमा जुटेका छन् । मन्त्रीहरूसँग दुई दिन प्रधानमन्त्री कार्यालय सिंहदरबारमा छलफल गरेपछि आज प्रधानमन्त्रीले प्रदेशगत रूपमा सांसदहरूसँग छलफल गरिरहेका छन् ।

छलफलमा नीति कार्यक्रम र बजेट निर्माण अघि समेट्नुपर्ने विषयमा समेत प्रधानमन्त्रीले अनौपचारिक छलफल गरेको बुझिएको छ । साथै प्रधानमन्त्री मातहत रहेका कार्यालयसँगको ब्रिफिङमा पनि प्रधानमन्त्री शाह जुटिरहेका छन् । एकसरो छलफल गरेपछि हुने समस्या पहिचान गरेर सरकारले अगाडि सारेका सुशासनका एक सयवटा कार्यसूचीको कार्यान्वयन र बजेट निर्माणमा केन्द्रित हुने तयारीमा प्रधानमन्त्री छन् ।

यसैबीच प्रधानमन्त्री बालेन्द्र शाहले बोलाएको बैठक श्रम, संस्कृति पार्टीका अध्यक्ष तथा सांसद हर्क साम्पाङले बहिष्कार गर्ने बताएका छन् । प्रधानमन्त्री शाहले सिंहदरबारमा सोमबार बस्ने गरी बोलाएको बैठकमा सहभागी नहुने उनले बताएका छन् । हर्कले प्रतिनिधिसभाको बैठक बोलाउन मागसहित कुनै पनि कोठाभित्र हुने अनौपचारिक बैठकमा आफ्ना पार्टीका सांसद सहभागी नहुने बताएका छन् ।

सोमबार प्रधानमन्त्रीले सिंहदरबारमा कोशी प्रदेशका प्रतिनिधिसभा सदस्यहरूसँग छलफल गर्ने कार्यक्रम छ । उक्त कार्यक्रमका लागि प्रधानमन्त्रीको सचिवालयले श्रम, संस्कृति पार्टीका सांसदहरूलाई पनि बोलाएको थियो । अध्यक्ष साम्पाङले प्रमले बोलाएको कार्यक्रम बहिष्कारको निर्णयसहित तत्कालै प्रतिनिधिसभाको पहिलो बैठक बोलाउनुपर्ने अडान राखेका छन् ।

‘प्रधानमन्त्रीले संसद्को पहिलो बैठक बोलाउनुपर्छ । संसद् नबोलाएर गरिने कोठे बैठकमा हामी जाँदैनौँ । सदनको बैठक बोलाए त्यही कुरा राख्छौँ’, उनले भने, ‘हप्ताको एक पटक कम्तीमा पनि संसद् बैठक राख्नु पर्छ । जनताको प्रश्नदेखि सरकार भाग्न पाउँदैन ! सबै प्रश्नका उत्तर दिनै पर्छ सरकारले !’

१३ चैतमा प्रधानमन्त्री नियुक्त भएकै दिन प्रधानमन्त्री बालेन्द्रले गौरीबहादुर कार्की संयोजतत्वको जेन–जी आन्दोलन जाँचबुझ आयोगको प्रतिवेदन कार्यान्वयन गर्ने निर्णय गरेको थियो । सोही निर्णयका आधारमा आयोगले सिफारिस गरेका पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक समातिएका थिए । आइतबार बिहान पूर्वमन्त्री दीपक खड्का र मध्यराति एमालेकी पूर्व प्रदेश सांसद रेखा शर्मा समातिएका छन् ।