अखबार नेपाल ट्रेन्डिङ

काठमाडौं: पूर्वप्रधानमन्त्री तथा नेकपा (एमाले)का अध्यक्ष केपी शर्मा ओलीलाई प्रहरीले गरेको गिरफ्तारीको विषयमा एमालेले औपचारिक रूपमा विरोध गर्दै सडक, सदन र अदालतबाट लड्ने घोषणा गरेको थियो । तर, शनिबारदेखि एमालेले सुरु गरेको सडक आन्दोलनमा भने एमालेका नेता तथा कार्यकर्ता खासै देखिएनन् ।

भदौ २३ गते भएको जेन-जी आन्दोलनको क्रममा सरकारको आदेशको कारणले विद्यार्थीहरूको ज्यान गएको भन्दै शनिबार बिहान प्रहरीले ओलीलाई पक्राउ गरेको थियो । सो लगत्तै बसेको एमाले सचिवालयको बैठकले शनिबारबाट नै देशव्यापी आन्दोलन गर्ने घोषणा गर्‍यो । एमालेको घोषणा अनुसार आइतबार सबै जिल्ला प्रशासन कार्यालयमार्फत एमालेले सरकारलाई ज्ञापन पत्र बुझाउने कार्यक्रम तय गरेको थियो । तर, सबै जिल्लामा आयोजना गरिएको कार्यक्रममा भने एमालेका कार्यकर्ताको निकै न्यून उपस्थिति देखियो । शनिबारदेखि सुरु गरेको आन्दोलनमा आइतबारसम्म कुनैपनि केन्द्रीयस्तरका पदाधिकारी पनि सडकमा देखिएका छैनन् ।

विशेषगरी पार्टीभित्रको ओलीको हार्डलाइनर भनेर चिनिने खेमाले आफूलाई आक्रामक रूपमा प्रस्तुत गर्न खोजेको छ भने पार्टीभित्र लामो समयदेखि सिमान्तकृत बन्दै आएको समूह भने नम्र रूपमा प्रस्तुत भएको छ । केही समयअघि एमालेमा नेतृत्वको दावी गर्न आइपुगेकी पूर्वराष्ट्रपति विद्यादेवी भण्डारी अहिले पनि एमालेभित्र एउटा समूहको नेतृत्व गर्छिन् । उनले शनिबार विज्ञप्ति जारी गर्दै सरकारले अपरिपक्क कदम चालेको भन्दै उक्त निर्णयलाई पुनर्विचार गरी फिर्ता लिन उपयुक्त हुने बताएकी थिइन् ।