अखबार नेपाल ट्रेन्डिङ

काठमाडौं: तेस्रो सत्यनारायणबहादुर श्रेष्ठ स्मृति मिडियाकप फुट्सल प्रतियोगिताको उपाधि ललितपुर महानगरपालिका-१६ का कलाकार समितिले जितेको छ । शनिबार सम्पन्न भएको प्रतियोगितामा कलाकार समितिले फाइनलमा राष्ट्रिय फोटो पत्रकार समूह, नेपाल (एनएफपिजे) लाई पेनाल्टी सुटनआउटमा ३–२ गोल अन्तरले हराउँदै उपाधि जितेको हो ।

उपाधि भिडन्तको निर्धारीत समयको खेल १–१ गोलको बराबरीमा सकिएपछि उपाधिको छिनोफानो पेनाल्टी सुटआउटबाट भएको हो । निर्धारित समयमा कलाकार टोलीका युजेश श्रेष्ठ र एनएफपिजे टोलीबाट लोकेश लिम्बुले गोल गरेका थिए । सञ्चार तथा सूचना प्रविधि मन्त्री जगदीश खरेलले मैदानमै पुगेर फाइनल खेल अवलोकन गरेका थिए । प्रतियोगितामा राष्ट्रिय समाचार समिति (रासस) तेस्रो स्थानमा रह्यो ।

यसअघि सेमिफाइनलमा ललितपुर-१६ कलाकार समितिले आयोजक नेवाः पत्रकार राष्ट्रिय दबूलाई हराउँदै फाईनल प्रवेश गरेको थियो भने राष्ट्रिय फोटो पत्रकार समुहले राष्ट्रिय समाचार समिति (रासस) लाई हराउँदै उपाधि भिडन्त पक्का गरेको थियो । ८ टिम सहभागी प्रतयोगितामा प्रत्येक दुई समूहबाट शीर्ष दुई/दुई टोली सेमिफाइनलमा प्रवेश गरेका थिए । प्रतियोगितामा नेपाल आदिवासी जनजाति पत्रकार महासंघ (फोनिज), तामाङ पत्रकार संघ, बोधिचर्या नेपाल र आर्दश विद्या मन्दिर (एभिएम)समूह चरणबाटै बाहिरिए । प्रतियोगितामा विजेता टोलीका युजेश ९ गोलसहित सर्वाधिक गोकलर्ता बने । यसैगरी एभिएमका नवीन महर्जन उत्कृष्ट गोलरक्षक र राष्ट्रिय फोटो पत्रकार समुह, नेपालका लोकेश सर्वश्रेष्ठ खेलाडी चुनिए ।

प्रतियोगिता अन्तर्गत नेवाः पत्रकार राष्ट्रिय दबू र नेवाः पत्रकार राष्ट्रिय दबू, ललितपुरबिच महिला मैत्री फुटसल खेल पनि खेलाईएको थियो । जसमा ललितपुरको महिला पत्रकार टोली पेनाल्टी सुटआउटमा २-१ गोल अन्तरले विजयी भएको थियो ।

ललितपुर महानगरपालिका-५ का अध्यक्ष विकासमान श्रेष्ठ, ललितपुर महानगरपालिका-१६ का अध्यक्ष निर्मलरत्न शाक्य, नेवाः पत्रकार राष्ट्रिय दबुका अध्यक्ष नृपेन्द्रलाल श्रेष्ठ फोनिजका अध्यक्ष लकी चौधरी, एभिएमकी प्रिन्सिपल सुजिता मानन्धर लगायतले विजेता तथा उपविजेता टोलीलाई ट्रफी, पदक तथा प्रमाणपत्र प्रदान गरेका थिए ।

नेवाः पत्रकार राष्ट्रिय दबूले श्रेष्ठको ११०औँ जन्मोत्सव मनाउने क्रममा फुटसलको आयोजना गरेको हो । नेवाः पत्रकार राष्ट्रिय दबूका अध्यक्ष नृपेन्द्रलाल श्रेष्ठले सत्यनारायण बहादुर श्रेष्ठलाई नेपाल पत्रकार महासंघको संस्थापकको पहिचान दिनुपर्ने अभियान अन्तर्गत फुटसल प्रतियोगिता हरेक वर्ष आयोजना गर्दै आएको बताए ।