अखबार नेपाल ट्रेन्डिङ

काठमाडौं: ‘स्वास्थ्यका लागि खेलकुद’ मुल नारा सहित सेभेन ‘ए’ साईड पहिलो मनोरञ्जन फुटसल लिग-२०८२ प्रतियोगिता हुने भएको छ । लायन एफसीद्वारा आयोजित फुटसल लिग प्रतियोगितामा पाँच टोलीको सहभागी हुने जनाईएको छ ।

प्रतियोगिताको सम्पूर्ण तयारी पुरा भएको लायन एफसीका आयोजक तथा संयोजक ईन्द्र लामाले बताए । पाँच टोलीको सहभागी रहने यस प्रतियोगिता सबै सहभागी टोली नै आयोजक भएको र साथीभाइबीच आपसी भाइचाराको सम्बन्ध मजबुद हुने लामा बताउँछन् । त्यसैले प्रतियोगिताको नाम नै मनोरञ्जन फुटसल लिग राखिएको उनले बताए । प्रतियोगिताको विजेता र उप-विजेतालाई ट्रफी वितरण गरिने पनि संयोजक लामाले बताए ।

प्रतियोगिताबाट सहभागी टीलीसँग मिलेर उठाईएको रकम वापत सबै खेलाडिहरुले खेल सकिएपछि खानपिन र मनोरञ्जनात्मक तरिकाले समापन गरिने आयोजक समितिका व्यवस्थापक हेम केसीले बताए । खेलको माध्यमबाट साथीभाइसँग नजिकबाट आत्मियता बढ्ने भएकोले पनि यो आयोजना विशेष रहेको र आगामी दिनमा पनि यस्तै खालको प्रतियोगिता आयोजना गर्दै जाने केसीले बताए ।

भदौ  १४ गते शनिबार ईलाईट खेल मैदान, तेञ्जिङ चोकमा हुने प्रतियोगितामा आयोजक टोली लायन एफसी ‘ए’ र ‘बी’ सहित शिलापत्र मिडिया, शंकर एफसी, टाईगर युनाईटेड एफसीको सहभागी हुनेछ । प्रतियोगितालाई किङ्गस हिल प्रिमियम वाईन, हाइभिडियो, उदयपुर फुड प्रोडक्सन, एबीसी ट्रेड ग्रुपले साथ दिएको छ भने मिडिया पार्टनरको रुपमा अखबार नेपाल डटकम, शिलापत्र, अन्नपूर्ण टाइम्स, हेरालो खबर, सडक सदन साप्ताहिक र यूट्युव च्यानल नयाँ फैलो रहेको छ ।

सन् २०११ देखि नेपालमा खेल्न थालिएको फुटसल पछिल्लो समय स्वास्थ्यका लागि भएपनि काठमाडौं र सहरी क्षेत्रमा फुटसल खेल्नेको संख्या बढ्दो छ । युवा माझ लोकप्रिय बनेको फुटसल सानो मैदानमा इन्डोरभित्रै खेल्न सकिने भएकाले फुटसलमा क्रेज बढ्दो छ  । फुटसलमा व्यावसायिक सफलता बढ्नु नै सकारात्मक पाटो पनि हो । मैदान अभावले फुटबल खेल्न नपाउने पारखीका लागि यो उपयुक्त विकल्प बनेको छ । फुटसलका अधिकांश नियम फुटबलसँग मेल खान्छन् । तर, थ्रो गर्दाको नियम भने फरक छ । फुटबलमा हातले थ्रो गरिन्छ भने फुटसलमा खुट्टाले गरिन्छ ।