अखबार नेपाल ट्रेन्डिङ

काठमाडौः ग्लोबल आइएमई बैंकले आर्थिक वर्ष २०८१/८२ मा सवा ६ अर्ब रुपैयाँ खुद नाफा आर्जन गरेको छ । बैंकले बुधबार सार्वजनिक गरेको चौथो त्रैमासिक वित्तीय विवरण अनुसार, गत आवमा बैंकको खुद नाफा ६ अर्ब २० करोड ४७ लाख ४५ हजार रुपैयाँ पुगेको हो । यो अघिल्लो आवको तुलनामा १.०९ प्रतिशत मात्र बढी हो । अघिल्लो आवमा बैंकले ६ अर्ब १३ करोड ७४ लाख ५४ हजार रुपैयाँ नाफा कमाएको थियो ।

बैंकको खुद ब्याज आम्दानीमा भने सानो गिरावट आएको छ । गत आवमा बैंकले १६ अर्ब ७१ करोड २२ लाख ७७ हजार रुपैयाँ ब्याज आम्दानी गरेको छ । जुन अघिल्लो आवको तुलनामा ०.८५ प्रतिशत कम हो । त्यस्तै, सञ्चालन नाफा ८ अर्ब ७७ करोड ५ लाख ७८ हजार रुपैयाँमा सीमित भएको छ । जुन अघिल्लो वर्षको तुलनामा ३.०१ प्रतिशत कम हो ।

गत आवमा बैंकको वितरणयोग्य नाफा ५ अर्ब ३७ करोड ९३ लाख रुपैयाँ रहेको छ । हाल बैंकको चुक्त पुँजी ३८ अर्ब ११ करोड ५८ लाख रुपैयाँ छ । जसको आधारमा बैंकले करिब १४.११ प्रतिशत लाभांश वितरण गर्न सक्ने अवस्था बनाएको छ । बैंकको जगेडा कोषमा २४ अर्ब २१ करोड रुपैयाँ रहेको छ । वित्तीय सूचकहरूमा, बैंकको प्रति सेयर आम्दानी (EPS) १६.२८ रुपैयाँ र प्रति सेयर नेटवर्थ १७७.६३ रुपैयाँ रहेको छ । यद्यपि, खराब कर्जा (NPL) ४.८७ प्रतिशतमा बढेको देखिन्छ ।

बैंकको व्यवसायिक गतिविधिमा भने उल्लेखनीय वृद्धि भएको छ । निक्षेप संकलन १२.९५ प्रतिशतले बढेर ५ खर्ब ५० अर्ब ६२ करोड ८४ लाख रुपैयाँ पुगेको छ । त्यस्तै, कर्जा लगानी ११.४६ प्रतिशत वृद्धि भई ४ खर्ब ११ अर्ब ७९ करोड १७ लाख रुपैयाँ पुगेको छ ।