अखबार नेपाल ट्रेन्डिङ

काठमाडौं: गएको शुक्रबार र शनिबार आएको अबिरल वर्षाको कारण काभ्रेको विभिन्न स्थानमा आएको बाढी र पहिरोका कारण जिल्लाको विभिन्न ठाँउमा अलपत्र परेकालाई नेपाली सेनाको हेलिकप्टरबाट हालसम्म करिव ८ सय जनाको उद्धार गरिएको छ ।

कालीजंग गण धुलिखेलका गणपति प्रमुख सेनानी प्रकशबहादुर सिंहले नेपाली सेनाका फौज विभिन्न स्थानमा परिचालन गरी खोज तथा उद्धार कार्यमा सक्रिय भएको बताए । नेपाली सेनाको कालीजंग गणले मंगलटार इलाकामा रहेका अलपत्र अवस्थाका नागरिकहरुलाई रोशी ९ मा खाद्यान्न समेत बितरण गरेको थियो भने ३७ ब्यक्तिहरुको उद्धार गरेको थियो । जसमा २३ जना घाइते भएका थिए । पनौती नगरपालिका वडा नम्वर १२ मा उद्धार टोली मार्फत ३ जनाको उद्धार पछि अस्पताल पठाएको थियो । रोशी गाउँपालिकामा ३ बिदेशी नागरिक सहित ४० ब्यक्तिहरुको उद्धार गरेको छ । चौरीदेउराली, बेथान्चोक गाउँपालिकामा रहेका घाइतेहरुको पनि उद्धार गरेको छ ।

रोशी र तेमाल गाउँपालिकामा गणले दुई सय भन्दा धेरै ब्यक्तिलाई खाद्यान्न सामाग्री उपलब्ध गराएको छ भने सिन्धुली र रोशी गाउँपालिमा अलपत्र रहेका विदेशी नागरिकहरु सतिह ३७ जनाले तेश्रो चरणमा धुलिखेल ल्याएको थियो । खोज र उद्धारसँगै नेपाली सेनाको फौजले स्थानीयहरुको पुरिएका घरहरुको सामाग्री निकाल्न सहयोग गरिरहेका छन् भने नागरिकहरु पुरिएको अवस्थामा खोजका लागि सहयोग गरिरहेका छन् ।