अखबार नेपाल ट्रेन्डिङ

काठमाडौं: अविरल वर्षाका कारण देशका विभिन्न स्थानमा गएको बाढी र पहिरोमा परी २४ जनाको मृत्यु भएको छ । ललितपुरमा ९, भक्तपुर, काभ्रे र पाँचथरमा ३-३, सिन्धुपाल्चोक र धनकुटामा २-२ तथा काठमाडौं, झापामा १-१ जनाको मृत्यु भएको प्रहरीले जनाएको छ भने २७ जना बेपत्ता छन् ।

ललितपुरमा मात्रै बाढी पहिरोमा परी ९ जनाको मृत्यु भएको छ । ११ जना हराइरहेका छन् । उनीहरुको विवरण संकलनको काम भइरहेको जिल्ला प्रहरी परिसर ललितपुरले जानकारी दिएको छ । भक्तपुरमा पहिरोमा परी तीन जनाको मृत्यु भएको छ । सूर्यविनायक नगरपालिका-९ पलाँसेमा पहिरोले घर पुर्दा कालिकोटका तीन जानको मृत्यु भएको हो ।

त्यस्तै, काभ्रेको तेमाल गाउँपालिका-७ मा पहिरोले घर पुरिँदा तीन जनाको मृत्यु भएको छ । आज बिहान करिब ३ बजेतिर भीमबहादुर तामाङको घर पहिरोले पुर्दा ५० वर्षीया पातली तामाङ र ४० वर्षीया नक्कली तामाङको मृत्यु भएको प्रहरीले जनाएको छ । थप एकजना मृतको भने पहिचान खुलेको छैन् । यस्तै सिन्धुपाल्चोकको लिसङ्खु पाखर गाउँपालिका ३ मा पहिरोले घर पुर्दा पूर्व वडाध्यक्ष काजीबहादुर लामा र उनकी श्रीमती सुन्तली तामाङको मृत्यु भएको हो । उता, पाँचथरको फिदिममा पहिरोले घर पुर्दा तीन जनाको मृत्यु भएको छ । वडा नं ४ मा २४ वर्षीया सपना शेर्पा र उनकी छोरी पाँच वर्षीया डोल्माको मृत्यु भएको हो ।

यस्तै फिदिम-१ मा गएको पहिरोमा परि स्थानीय ५० वर्षका गोपी विश्वकर्माको मृत्यु भएको छ । फिदिम–१ कै पाँचजना अझै वेपत्ता छन् । धनकुटामा पहिरोमा परी आमाछोरीको मृत्यु भएको छ । पाख्रिबास नगरपालिका-५ गुराँसेमा सन्तोष तामाङकी ३० वर्षिया श्रीमती आशा तामाङ र उनकी आमा रामकुमारी तामाङको मृत्यु भएको जिल्ला प्रहरी कार्यालयले जानकारी दिएको छ ।

काठमाडौंको नागार्जुन नगरपालिकामा घर भत्किँदा एकजनाको मृत्यु भएको छ । सशस्त्र प्रहरी बलका अनुसार घर अरु केही व्यक्ति पुरिएका छन् । मृतक र बेपत्ताको परिचय खुल्न बाँकी छ । झापामा बाढीले बगाउँदा एक जनाको मृत्यु भएको छ । झापा गाउँपालिका-२, बालुवाटार बस्ने ३५ वर्षीया धनमाया घोरासैनीको माइखोलामा आएको बाढीमा परी मृत्यु भएको हो । दुई जना बेपत्ता छन् । यस्तै काभ्रेको पनौती नगरपालिका-११ थुम्कीमा पहिरोले घर बगाउँदा पाँचजना सम्पर्कविहीन भएका छन् ।

अविरल वर्षाका कारण आएको बाढीले मकवानपुरको इन्द्रसरोवर गाउँपालिका-३ सिस्नेरी बजारका ३० वटा घरटहरा बगाएको छ । बाढीका कारण इन्द्रसरोवर गाउँपालिका-२ खानीखेतस्थित २८ घर डुबानमा परेका छन् । अविरल वर्षाका कारण कुलेखानी जलाशय भरिएपछि आज बिहान बाँधका दुई वटा ढोका खोलिएको थियो । विभिन्न खोलामा जलसतह बढेको र कुलेखानी जलाशयका कारण बाढी आएको प्रहरीले जनाएको छ ।

बाढी तथा डुबनका कारण मानवीय क्षति भने नभएको सिस्नेरी प्रहरीले जनाएको छ । स्थानीयलाई सुरक्षित स्थानमा राखिएको छ । अविरल वर्षाका कारण पहिरो जाँदा हेटौँडा-काठमाडौँ सडक अवरुद्ध भएको छ । पहिरोका कारण कान्तिलोकपथ, भीमफेदी-कुलेखानी-सिस्नेरी-दक्षिणकाली-काठमाडौँ, कुलेखानी-फाखेल-काठमाडौँ, कुलेखानी-मातातीर्थ-काठमाडौँ र त्रिभुवन राजपथ अवरुद्ध भएको मकवानपुर प्रहरीले जनाएको छ ।