अखबार नेपाल ट्रेन्डिङ

काठमाडौं: शिक्षा, विज्ञान तथा प्रविधी मन्त्री माननीय अशोक कुमार राईको त्रिवि शिक्षण अस्पताल महाराजगन्जमा कानको शल्यक्रिया कोक्लियर इम्पलान्ट सफल भएको छ ।

डाक्टर रबिन्द्र भक्त प्रधानाङ्गको टिमले लगातार साढे ४ घण्टा लगाएर शल्यक्रिया गरेका हुन् । शल्यक्रियापछि मन्त्री राईको स्वास्थ्यमा सुधार आएको छ । सोमबार कानको सफल शल्यक्रिया पछि पोस्ट अप्रेसन वार्डमा उपचाररत मन्त्री राईको कुनै किसिमको शारीरिक जटिलता आएको छैन ।

डाक्टरका अनुसार प्रत्यारोपण गरिएको मेसिन कोक्लियर र बिरामीको शारीरिक प्रतिक्रिया सकारात्मक छ । मन्त्री राईलाई ३ दिनसम्म आगन्तुक भेटघाटहरु पूर्णत बन्द गर्न डाक्टरहरुले सुझाव दिएका छन् । चिकित्सकका अनुसार कोक्लियर इम्पलान्टले सुन्न नसक्ने व्यक्तिलाई आवाज सुन्न मद्दत गर्छ । कानमा समस्या देखिएपछि राई सोमबार अस्पतालमा भर्ना भएका थिए ।