अखबार नेपाल ट्रेन्डिङ

काठमाडौं: मंसिरमा हुने स्थानीय तहको उपनिर्वाचनमा २ सय ८१ जनाको उम्मेदवारी परेको छ । रिक्त ४८ पदका लागि बुधबार मनोनयन दर्ता कार्यक्रम थियो । निर्वाचन आयोगका अनुसार राजनीतिक दलका २ सय १७ र स्वतन्त्र ६४ जनाले उम्मेदवारी दर्ता गरेका छन् । ३५ जिल्लाका ४४ स्थानीय तहमा मंसिर १४ गते उपनिर्वाचन हुँदैछ ।

स्थानीय तहमा उपमहानगरपालिकाको प्रमुख १, गाउँपालिकाका अध्यक्ष ३, गाउँपालिकाका उपाध्यक्ष १ र गाउँपालिका तथा नगरपालिकाका वडाध्यक्ष ४३ पदका लागि उपनिर्वाचन हुन लागेको हो । महिला उम्मेदवारको संख्या २६ छ । धरान उपमहानगरपालिकाको प्रमुखका लागि एक महिलासहित २३ जनाको उम्मेदवारी परेको छ । नेकपा, कांग्रेस, समाजवादीलगायत दलबाट १३ र स्वतन्त्र १० गरी २३ जनाले उम्मेदवारी दर्ता गरेका छन । संखुवासभाको मकालु गाउँपालिका अध्यक्षमा ६ जनाले पाँचथरको फाल्गुनान्द गाउँपालिकाको अध्यक्षमा ८ जनाको उम्मेदवारी परेको छ । त्यस्तै फिदिम नगरपालिका १ को अध्यक्षमा ७ र हिलिहाङ गाँउपालिका ७ को अध्यक्षमा ६ जनाले उम्मेदवारी दिएका छन् ।

मोरङको धनपालथान गाउँपालिका २ को अध्यक्षका लागि ७ जना खोटाङको साकेला गाउँपालिका ३ को अध्यक्षमा ४, भोजपुरको पौवादुङ्मा गाउँपालिका १ को अध्यक्षमा ३ उम्मेदवारी परेको छ । त्यस्तै प्रदेश २ को महोत्तरी पिपरा गाउँपालिका अध्यक्षमा २०, बलवा नगरपालिकाको २ र ८ को अध्यक्षमा २० र मटिहानी नगरपालिका ६ को अध्यक्षका लागि ६ जनाले मनोनयन दर्ता गराएका छन् । त्यसै सर्लाहीको हरिपूर्वा नगरपालिका १ को अध्यक्षका लागि दुई जना स्वतन्त्रसहित ७ जनाको उम्मेदवारी परेको छ । चितवन भरतपुर महानगरपालिका र खैरहनी नगरपालिकामा रिक्त ३ वडा अध्यक्षका लागि ६ दलले उम्मेदवारी दर्ता गराएका छन् ।

पूर्वी नवलपरासीको बौदीकाली गाउँपालिका ५ को अध्यक्षमा ३ जनाको उम्मेदवारी दर्ता भएको छ । प्रदेश ५ मा रिक्त रहेका ९ वडा अध्यक्षको उपनिर्वाचनका लागि मनोनयन दर्ता भएको छ। प्युठानमा ३ सहित बाँके, रोल्पा, कपिलवस्तु, दाङ, गुल्मी र अर्घाखाँचीमा १/१ वडा अध्यक्ष पदमा मंसिर १४ गते उपनिर्वाचन हुँदैछ । बाँकेको कोहलपुर नगरपालिका-६ को वडा अध्यक्षमा ५ दलले उम्मेदवार उठाएका छन् । कपिलवस्तुको शिवराज नगरपालिका वडा नम्बर १० लालपुरमा १२ जनाको उम्मेदवारी परेको छ । उपनिर्वाचनमा सीके राउतको जनमत पार्टीले पनि उम्मेदवारी दिएको छ । सीकेको पार्टी पहिलो पटक चुनावमा सहभागी भएको छ ।

कर्णाली प्रदेशको हुम्ला खार्पुनाथ गाउँपालिकामा उपाध्यक्ष तीन दलले र कुमाख गाउँपालिकाको वडा नम्बर ५ को अध्यक्षमा ५ जनाको उम्मेदवारी परेको छ । सुदूरपश्चिम प्रदेशका ५ जिल्लामा २२ जनाको उम्मेदवारी दर्ता भएको छ । बैतडीका तीन स्थानीय तहका ३ वडामा ८ जनाको उम्मेदवारी परेको छ । सुर्नया गाउँपालिका १, दोगडाकेदार गाउँपालिका ४ र पुर्चौंडी नगरपालिका ४ मा अध्यक्षका लागि उम्मेदवारी दर्ता भएको हो । त्यसै कञ्चनपुर पुनर्वास नगरपालिका ३ को अध्यक्षका लागि ५, डोटीको आदर्श गाउँपालिका २ को अध्यक्षका लागि ४ जनाको उम्मेदवारी परेको छ भने बाजुराको त्रिवेणी नगरपालिका १ को अध्यक्षका लागि ३ जनाले उम्मेदवारी परेको छ ।