अखबार नेपाल ट्रेन्डिङ

काठमाडौं: नेकपा एमालेको बागमती प्रदेशको अध्यक्षका लागि मकवानपुरका कृष्णप्रसाद दाहाल र रामेछापका कैलाश ढुंगेलबीच प्रतिस्पर्धा हुने भएको छ ।

सर्वसम्मत अध्यक्ष चयनका लागि सहमतिको प्रयास भएपनि सम्भव नभएपछि आज मतदान हुने भएको छ । रामेछाप एमालेका अध्यक्ष आनन्द कुमार श्रेष्ठको प्रस्तावमा ढुंगेल र हिदम लामाको प्रस्ताव र देवकृष्ण विकलको समर्थनमा दाहालले उम्मेदवारी दर्ता गरेका हुन् ।

एमालेको बागमती प्रदेश अध्यक्षमा उम्मेदवारी दिएका ढुंगेल बागमती प्रदेशको पूर्वआर्थिक मामिला तथा योजनामन्त्री हुन् भने दाहाल पार्टीको केन्द्रीय सदस्य हुन् ।

यो निर्वाचन प्रत्यक्ष रुपमा ढुंगेल र दाहालबीचको प्रतिस्पर्धा देखिएपनि अन्तर्यमा युवा नेताहरु गोकुल बास्कोटा र महेश बस्नेतबीचको टक्कर देखिएको छ । बस्नेतले ढुंगेललाई अघि सारेका छन् भने बास्कोटाको समर्थनमा दाहाललाई अगाडि सारेका हुन् । यो निर्वाचनलाई यी दुई नेताको शक्ति परिक्षणका रुपमा लिईएको छ ।

एक नेताका अनुसार बास्कोटा अध्यक्ष मण्डलमा रहदा बस्नेत भने अध्यक्ष मण्डलमा अटाउन सकेनन् । बस्नेतलाई अध्यक्ष मण्डलबाट आउट गर्न बास्कोटा सफल भएको चर्चा छ । त्यसो त केन्द्रीय सचिवालय बैठकले केन्द्रीय नेताहरूलाई जिल्लामा खटाउने निर्णयको चर्को बिरोध गरेका बास्कोटा अन्ततः सचिवालयको निर्णय अनुसार सिन्धुपाल्चोकमा खटिए ।

त्यसबेला समाजबादीका नेता सुभाष कर्माचार्य लागायतको जिल्लाका नेतालाई एमालेमा भित्र्याउने काम गरे । अहिले सिन्धुपाल्चोकको समाजबादीको सिंगो जिल्ला कमिटी एमालेमा समाहित गर्ने तयारी गरे । बास्कोटाले कर्माचार्यलाई सचिब बनाउन चाहान्थे तर चाहाना पूरा गर्न नसक्दा बास्कोटा चिप्लिएको चर्चा छ ।

यसै सन्दर्भमा बास्कोटाले महासचिव शंकर पोखरेललाई भेटेर झाको झारेको बताईन्छ । किनकी कर्माचार्यहरुलाई भित्र्याउदा बास्कोटाले पोखरेललाई प्रमुख अतिथि मात्र बनाएनन् बालकोटको ग्रीन सिग्नल र पोखरेलको बाचा बन्धन कर्माचार्यलाई सेट गर्ने भन्ने थियो तर पोखरेलले कर्माचार्यलाई सचिब बनाउन नसकिने बताएपछि पोखरेलसँग बास्कोटा पड्किएको बताईन्छ । त्यसैलाई ईंगित गर्दै बास्कोटाले सामाजिक संजालमा समेत असन्तुष्टि ब्यक्त गरेका छन् ।

त्यसो त अध्यक्षका उम्मेदवार ढुँगेल महासचिव पोखरेल निकट मानिन्छन् । जस्लाई बस्नेतको साथ छ भने उपाध्यक्ष बिष्णु पौडेल निकट मानिएका दाहाललाई बास्कोटाको समर्थन छ । केन्द्रमा बस्नेत उपाध्यक्ष पौडेल निकट र बास्कोटा महासचिव पोखरेल निकट भनेर चिनिदै आएका छन् । तर बस्नेत र बास्कोटाबीच यो अधिवेशनमा भने यसको उल्टो कित्ताकाट हुन पुगेको छ । पार्टीभित्र आन्तरिक शक्ति सन्तुलनमा उनीहरुको अबको राजनीति कसरी अघि बढाउछन त्यो हेर्न बाँकी नै छ ।

निर्वाचन समितिले मतदानका लागि मतदाताहरुको नामावली प्रकाशन गरेको छ । मतदान आज बिहानबाट पार्टी मुख्यालय च्यासलमा हुनेछ । अधिवेशनले अध्यक्ष, उपाध्यक्ष, सचिव र दुई उपसचिवसहित २४० सदस्यीय नयाँ नेतृत्व चयन गर्नेछ ।