अखबार नेपाल ट्रेन्डिङ

काठमाडौं: आईसीसी महिला टी–२० विश्वकप एसिया छनोटमा नेपालले मलेसियालाई नेपालले ५ रनले पराजित गरेको छ । क्लालाम्पुरस्थित बायमास ओभलमा नेपालमाथि ८५ रनको विजयी लक्ष्यसहित मैदानमा उत्रेको मलेसियाले निर्धारित २० ओभरमा ९ विकेट गुमाउँदै ७९ रनमात्र बनाउन सक्यो ।

मलेसियाका लागि कप्तान जुलिया वान रोस्लीले  सर्वाधिक २८ रनको योगदान गरिन् । त्यस्तै एइना हमिजाले १४ रन बनाइन् । नेपालका कविता कुँवर र कविता जोशीले समान २-२ विकेट  लिए । रुविना क्षेत्री र अस्मिना कर्मचार्यले समान १-१ विकेट लिए ।

त्यसअघि टस हारेको नेपालले निर्धारित २० ओभरमा ६ विकेट गुमाउँदै ८४ रन बनाएको थियो ।  नेपालका लागि सिता रानामगरले सर्वाधिक ३८ रन बनाइन् । उनले ५४ बलको सामना गर्दै एक चौकाको मद्दतमा नटआउट रहिन् ।  कप्तान रुबिना क्षेत्रीले १२ रन बनाउँदा अप्सरी बेगमको नाममा १७ रनको योगना रह्यो ।

नेपालले २४ रन बनाउँदा ५ विकेट गुमाएको थियो । छैठौं विकेटका लागि सिता र रुबिनाले ५१ रनको साझेदारी गर्दै नेपाललाई मध्यम अवस्थामा पुर्‍याए । नेपालको ७५ रन हुँदा कप्तान रुबिनालाई गुमायो । नेपालका ३ खेलाडी शून्यमा आउट भए ।

मलेसियाकी अइना हमिजले २ तथा इजाती इस्माली र निक नुरले समान १-१ विकेट लिए ।  नेपालले आफ्नो दोस्रो खेलमा भोलि बहराइनसँग खेल्ने छ ।

प्रतियोगिताको समूह ‘ए’ मा नेपाल, बहरान, भुटान, मलेसिया, कतार र युएई छन् । समूह ‘बी’ मा चीन, हङकङ, थाईल्यान्ड, कुवेत र म्यानमार छन् । प्रतियोगितामा हरेक समूहका शीर्ष दुई टोलीले सेमिफाइनलमा स्थान बनाउनेछन् । फाइनलमा पुग्ने दुई टोलीले २०२४ मा हुने ग्लोबल टि-२० क्वालिफायर खेल्न पाउनेछन् ।