अखबार नेपाल ट्रेन्डिङ

एजेन्सी: साउदी क्लब अल नासरले एसियाली च्याम्पियन्स लिगको प्लेअफमा शबाब अल अहलीलाई ४-२ ले पराजित गरेको छ ।

च्याम्पियन्स लिग छनोटका लागि प्लेअफमा अल नासरले ८७औं मिनेटसम्म २-१ ले पछाडि परेको थियो । तर अन्तिम ९ मिनेटमा अल नासरले ३ गोल थप्दै यस सिजनको च्याम्पियन्स लिगमा स्थान पक्का गरेको हो ।

अल–नासरको जितमा एन्डरसन टालिस्काले दुई गोल गरे भने सुल्तान अल–घानाम र मार्सेलो ब्रोजोभिचले एक–एक गोल थपे । पराजित शबाब अल-अहलीका लागि याह्या अल-घासानीले दुई गोल गरेपनि टोलीलाई जिताउन सकेनन् ।

अल-नासरले खेलको ११औं मिनेटमा टालिस्काले ब्रोजोभिचको उत्कृष्ट पासमा हेड गर्दै आफ्नो टोलीलाई अग्रता दिलाएका थिए । तर अल–नासरले अग्रता धेरै बेर टिकाउन सकेन । ७ मिनेटपछि अल-अहलीले गोल गर्दै खेल बराबरीमा ल्याएको थियो ।

दोस्रो हाफको पहिलो मिनेटमा गोल गर्दै अल-अहलीले खेलमा अग्रता लिएको थियो । काउन्टर अट्याकमा याह्या अल-घासानीले व्यक्तिगत दोस्रो गोल गर्दै आफ्नो टिमलाई अग्रता दिलाए ।

क्रिस्टियानो रोनाल्डो र सडियो माने आक्रमणमा रहेको अल-नसार त्यसपछि निकै आक्रमक प्रस्तुत भयो । लगातारको आक्रमण असफल भएपनि निर्धारित समयको ३ मिनेट बाँकी रहँदा अल नासर खेलमा बराबरी गोल गर्न सफल रह्यो सुल्तान अल-घानमले ८८औं मिनेटमा गोल गर्दै खेल बराबरीमा ल्याए । थपिएको अतिरिक्त समयको छैटौं मिनेटमा टास्लिकाले व्यक्तिगत दोस्रो गोल गर्दै अल नासरलाई अघि बढाए ।

त्यसको दुई मिनेटपछि मार्सेलो ब्रोजोभिचले गोल गर्दै एएफसी च्याम्पियन्स लिगमा आफ्नो टोलीको स्थान पक्का गरे । पराजित अल-अहलीले अब दोस्रो श्रेणीको एएफसी प्रतियोगिता, एएफसी कपमा प्रतिस्पर्धा गर्नेछ । एएफसी च्याम्पियन्स लिग र एएफसी कप दुवैको ड्र २४ अगस्टमा मलेसियाको क्वालालम्पुरमा हुनेछ ।

साउदीबाट यसअघि अल इतिहाद, अल फायहा र अल हिलाल च्याम्पियन्स लिगका लागि छनोट भइसकेका थिए । भारतको मुम्बई सिटी फुटबल क्लबले पनि समूह चरणमा स्थान पक्का गरिसकेको छ । प्लेअफबाट अल नासरसहित ८ टोलीको टुंगो लागेसँगै अब अगस्ट २४ मा समूह चरण ड्र हुनेछ ।