अखबार नेपाल ट्रेन्डिङ

काठमाडौं: नेपाल–भारतको बहुप्रतीक्षित अन्तरदेशीय पेट्रोलियप पाइपलाइन परियोजनाको उद्घाटन आज हुँदैछ । भारतको मोतिहारीबाट बाराको अमलेखगन्जसम्म बिछ्याइएको पाइपलाइन परियोजनाको नेपाल र भारतका प्रधानमन्त्रीले संयुक्त रुपमा आ-आफ्नो मुलुकबाट ‘स्वीच’ थिचेर उद्घाटन गर्ने कार्यक्रम रहेको छ ।

नेपालको तर्फबाट प्रधानमन्त्री केपी शर्मा ओलीले सिंहदरबारबाट र भारतको तर्फबाट प्रधानमन्त्री नरेन्द्र मोदीले हैदरावादबाट ‘भिडियो कन्फ्ररेन्स’मार्फत् एकैसाथ स्वीच थिचेर परियोजनाको उद्घाटन गर्ने कार्यक्रम तय गरिएको छ । दिल्लीबाट भारतीय प्रधानमन्त्री नरेन्द्र मोदीले स्वीच थिचेपछि बरौनीमा नेपाल आउने तेलको पाइप ‘अन’ हुने र सिंहदरबारबाट प्रधानमन्त्री ओलीले ‘रिसिभ’ स्विच थिचेपछि नपालको अमलेखगञ्जमा तेल झारिने गरी तयारी गरिएको आयल निगमले जानकारी दिएको छ ।

उद्घाटनसँगै मोतिहारीबाट अमलेखगन्जसम्म पाइपलाइन मार्फत पेट्रोलियम पदार्थ भित्रनेछ । पहिलो चरणमा पाइप लाइनबाट डिजेल ल्याइने छ । यसपछि क्रमशः पेट्रोल र मट्टीतेल ल्याइनेछ । मोतिहारी–अमलेखगन्ज पाइप लाइनको दूरी ६९ दशमलव २ किलोमिटर रहेको छ । जसमा नेपालतर्फ २६ दशमलव २ र भारततर्फ ३३ दशमलव ६९ किलोमिटर रहेको छ ।