अखबार नेपाल ट्रेन्डिङ

काठमाडौं: आगमी जुन जुलाईमा जिम्बावेमा हुने एकदिवसीय विश्वकप छनोट खेल्ने १० मध्ये ९ टोलीको टुङ्गो लागेको छ ।

विश्वकप छनोटमा श्रीलंका, वेस्टइन्डिज, जिम्बावे, नेदरल्यान्ड्स, नेपाल, ओमान, स्कटल्यान्ड, युएई र अमेरिकाले स्थान पक्का गरेका छन् ।

श्रीलंका, वेस्टइन्डिज, जिम्बावे र नेदरल्यान्ड्स सुपर लिगबाट पुछारमा रहँदै विश्वकप छनोटमा पुगेका हुन् । यी चार टोलीले सोझै विश्वकप खेल्ने अवसर गुमाएका हुन् ।

अब सुपर लिगबाट आयरल्यान्ड र दक्षिण अफ्रिका मध्य एक टोलीले छनोट खेल्नुपर्ने हुन्छ । लिग-२ बाट स्कटल्यान्ड शीर्ष, ओमान दोस्रो र नेपाल तेस्रो स्थानमा रहँदै विश्वकप छनोटमा पुगेका थिए ।

क्वालिफायर प्लेअफबाट अमेरिका शीर्ष र युएई दोस्रो स्थानमा रहँदै विश्वकप छनोटमा पुगेका हुन् । नियम अनुसार सुपर लिगका पुछारका पाँच टोली, लिग-२ का शीर्ष तीन र क्वालिफायर प्लेअफबाट शीर्ष दुई टोली गरि कुल १० टोलीले छनोट खेल्नेछन् ।

सुपर लिगमा नेदरल्यान्ड्स र १२ टेस्ट टोलीले प्रतिस्पर्धा गरेका थिए । आयोजक भारत सहित शीर्ष ७ टोलीले विश्वकपमा स्थान बनाएका छन् । अब दक्षिण अफ्रिका र आयरल्यान्ड मध्य एक टोली सोझै विश्वकपमा पुग्दा एक टोलीले छनोट खेल्नुपर्ने हुन्छ । लिग-२ मा ७ र क्वालिफायर प्लेअफमा ६ टोलीले प्रतिस्पर्धा गरेका थिए ।

सुपर लिगमा शीर्ष ७ मा रहँदै भारत, न्युजिल्यान्ड, अष्ट्रेलिया, इंग्ल्यान्ड, बंगलादेश, पाकिस्तान र अफगानिस्तान विश्वकपमा पुगेका छन् । भारतमा हुने विश्वकपमा १० टोली हुनेछन् । सिंगल राउन्ड रोविनको आधारमा सबैले एक अर्कासँग खेलेपछि शीर्ष चार टोलीले सेमिफाइनलमा स्थान बनाउनेछन् ।