अखबार नेपाल ट्रेन्डिङ

काठमाडौं: राष्ट्रिय बीमा संस्थानको नाफा साढे २७ प्रतिशत बढेको छ । संस्थानको गत आर्थिक वर्षको अन्त्यसम्म ७ करोड १७ लाख रुपैयाँ खुद नाफा कमाएको हो ।

संस्थानले ८ अर्ब ३९ करोड रुपैयाँ खुद बीमा शुल्क आर्जन गर्यो । बीमाशुल्क ११ प्रतिशत बढेको छ । अघिल्लो असार मसान्तसम्म संस्थानले ७ अर्ब ५८ करोड रुपैयाँ खुद बीमाशुल्क आर्जन गरेको थियो ।

यस्तै, सस्थानले बीमालेख धितोमा राखेर कर्जा उपलब्ध गराए बापत १५ करोड ३३ लाख रुपैयाँ कमाएको छ । सो अवधिमा २ अर्ब २६ करोड रुपैयाँ बराबरको बीमालेख धितो कर्जा दिएको हो ।

संस्थानले लगानी कर्जा तथा अन्य स्रोतबाट २ अर्ब ९३ करोड रुपैयाँ कमायो । सो अवधिमा संस्थानको १२ अर्ब ६४ करोड रुपैयाँ दिर्घकालिन लगानी छ ।

आम्दानीसँगै खर्च पनि बढेका छन् । संस्थानले गत आर्थिक वर्षको अन्त्यसम्म ३ अर्ब ९३ करोड रुपैयाँ बराबरको दाबो वापत भुक्तानी दिएको छ । २३ प्रतिशतले दाबी भुक्तानी बढेको देखिन्छ । अघिल्लो असारसम्म ३ अर्ब १९ करोड रुपैयाँ दाबी भुक्तानी दिएको थियो ।

सोहि अवधिमा संस्थानले १८ करोड ६० लाख रुपैयाँ अभिकर्ता कमिसन बापत दिएको छ । यस्तै, व्यवस्थापनका लागि १९ करोड रुपैयाँ खर्च भएको संस्थानले जनाएको छ ।

यस्तै, संस्थानले २ अर्ब ८३ करोड रुपैयाँ बराबरको दाबी बापत अझै भुक्तानी दिएको छैन ।

गत आर्थिक वर्षको अन्त्यसम्म संस्थानको चुक्ता पुँजी १८ करोड १० लाख रुपैयाँ छ । संस्थानको जगेडा कोषमा ४१ करोड ३८ लाख रुपैयाँ संचित छ । त्यस्तै, संस्थानको जिवान बीमा कोषको आकार ३७ अर्ब ४१ करोड रुपैयाँ छ ।