अखबार नेपाल ट्रेन्डिङ

भरतपुर: चितवन जिल्लाका स्वास्थ्य संस्थामा कार्यत ११७ जना स्वास्थ्यकर्मीमा कोरोना भाइरसको संक्रमण पुष्टि भएको छ ।

संक्रमित हुनेमा चिकित्सक, स्वास्थ्यकर्मी र कर्मचारीहरु छन् ।

चिकित्सक तथा स्वास्थ्यकर्मी कोरोना संक्रमित भएपछि केही अस्पतालको सेवा प्रभावित भएको छ ।

संघीय अस्पतालको रुपमा रहेको भरतपुर अस्पतालका चिकित्सक, स्वास्थ्यकर्मी र प्रशासनिक कर्मचारी गरी ३७ जनामा कोरोना संक्रमण पुष्टि भएको छ ।

तीमध्ये ७ जना चिकित्सक २० जना स्वास्थ्यकर्मी र अन्य प्रशासनिक कर्मचारी रहेका छन् ।

चिकित्सक, स्वास्थ्यकर्मीमा कोरोना देखिएसँगै अस्पतालमा संक्रमितको सङ्ख्या बढ्दै जाँदा सेवा प्रवाहमा कठिनाइ उत्पन्न भएको छ ।

यस्तै बिपी कोइराला मेमोरियल क्यान्सर अस्पताल चिकित्सक र स्वास्थ्यकर्मी गरी ४० जनालाई कोरोना संक्रमण पुष्टि भएको छ ।

अस्पतालका अनुसार ३ जना चिकित्सक २२ जना नर्स, ७ जना प्राविधिक र अन्य प्रशासनिक कर्मचारीमा संक्रमण देखिएको हो ।

चितवन मेडिकल कलेजमा कार्यरत ३० जनामा कोरोना संक्रमण पुष्टि भएको छ ।

अस्पतालका अनुसार १२ जना चिकित्सक, १४ जना नर्स र ४ जना अन्य कर्मचारीमा कोरोना संक्रमण पुष्टि भएको हो ।

कलेज अफ मेडिकल साइन्सेस शिक्षण अस्पतालमा १० जना चिकित्सक स्वास्थ्यकर्मीमा कोरोना संक्रमण देखिएको छ ।

अस्पतालका अनुसार ७ जना चिकित्सिक र तीन जना अन्य कर्मचारीमा कोरोना देखिएको हो ।

संक्रमित चिकित्सक एवं स्वास्थ्यकर्मी होम आइसोलेशनमा रहेका छन् ।

चिकित्सक, स्वास्थ्यकर्मी संक्रमित भएपनि स्वास्थ्य अवस्था भने सामान्य देखिएको छ ।