त्रिभुवन अन्तर्राष्ट्रिय विमानस्थलमा बरामद गरिएको ५० लाख प्रकरणमा सौर्य एयरका विराटनगर म्यानेजर पक्राउ
वि.सं.२०७८ पुस १८ आइतवार १४:५४
2K
shares
काठमाडौं: त्रिभुवन अन्तर्राष्ट्रिय विमानस्थलमा चाउचाउको कार्टुनबाट बरामद गरिएको ५० लाखबारे अनुसन्धानका लागि सौर्य एयरलाइन्सका विराटनगर स्टेसन म्यानेजर पक्राउ परेका छन् ।
सौर्य एयरलाइन्स विराटनगरका स्टेसन म्यानेजर प्रकाश पौडेललाई आज पक्राउ गरी काठमाडौं ल्याउने क्रममा रहेको विमानस्थल सुरक्षा स्रोतले जनाएको छ ।
करेन्ट चाउचाउको कार्टुनमा हालेर सौर्य एयर मार्फत शनिबार विराटनगरबाट काठमाडौं पठाइएको सो रकम रिसिभ गर्न आएकी सौर्य एयरलाइन्सकी कर्मचारी रेखा शाक्य पोखरेललाई प्रहरीले पक्राउ गरिसकेको छ ।
प्रहरीका अनुसार पोखरेलको बयानका आधारमा पौडेललाई नियन्त्रणमा लिइएको हो ।
करेन्ट चाउचाउको कार्टुनभित्र एक हजार दरका ४ हजार ९ सय ५० वटा र ५ सय दरका एक हजार वटा नोटहरू भेटिएको थियो ।
बरामद रकमसहित पोखरेललाई थप अनुसन्धानका लागि राजस्व अनुसन्धान विभाग बुझाइएको छ ।
वि.सं.२०७८ पुस १८ आइतवार १४:५४




















