अखबार नेपाल ट्रेन्डिङ

एजेन्सी: लिभरपुलले लेस्टर सिटीमाथि रोमाञ्चक जित निकाल्दै इंग्लिस फुटबल लिग कप अर्थात कारवाओ कपको सेमिफाइनलमा प्रवेश गरेको छ ।

लिभरपुलले ट्राइब्रेकरमा ५–४ को रोमाञ्चक जित निकाल्दै अन्तिम चारमा स्थान पक्का गरेको हो ।

निर्धारित समयको खेल ३–३ गोलको बराबरीमा सकिएपछि खेलको निर्णय ट्राइब्रेकरबाट लिइएको थियो ।

ट्राइब्रेकरमा लिभरपुलका जेम्स मिल्नर, रोबर्टो फिर्मिनो, एलेक्स अक्सलेड चेम्वरलेन, नावी केइटा र डिएगो जोटाले गोल गरे ।

ताकुमी मिनामिनोको पेनाल्टी क्रसबारमा लाग्दै बाहिरिएको थियो ।

लेस्टरका युरी टिलेमान्स, जेम्स म्याडिसन, मार्क अल्ब्राइटन र केलिची इहानेचोले गोल गर्दा लुकी थोमस र रायन बट्रान्डको प्रहारलाई लिभरपुलका गोलरक्षक काओइहिम केलहरले बचाए ।

खेलको ९औं मिनेटमा जेमी भार्डीको गोलबाट लेस्टरले अग्रता लिएको थियो । खेलको १९औं मिनेटमा एलेक्स अक्सलेड चेम्वरलेनले गोल गर्दै खेललाई २–१ को अवस्थामा ल्याए ।

खेलको ३३औं मिनेटमा जेम्स म्याडिसनले गोल गर्दै लेस्टरलाई ३–१ ले अघि बढाए ।

लिभरपुलका लागि खेलको ६८औं मिनेटमा डिएगो जोटाले ताकुमी मिनामिनोको पासमा गोल गर्दै खेललाई ३–२ को स्थितिमा ल्याए ।

इन्ज्युरी समयको थप गरिएको पाँचौ मिनेटमा लिभरपुलका ताकुमी मिनामिनोले जेम्स मिल्नरको पासमा गोल गर्दै खेललाई ट्राइब्रेकरमा लम्ब्याए ।

यो सँगै कारवाओ कपको सेमिफाइनल समिकरण पुरा भएको छ । यसअघि आर्सनल, चेल्सी र टोटेनहमले अन्तिम चारको यात्रा तय गरिसकेको छ ।

अब सेमिफाइनलमा आर्सनल र लिभरपुल तथा चेल्सी र टोटेनहमबीच प्रतिस्पर्धा हुनेछ ।