अखबार नेपाल ट्रेन्डिङ

काठमाडौं: झन्डै दुई दशकपछि सिन्धुपाल्चोकस्थित मेलम्ची नदीको पानी सुरुङ हुँदै आज काठमाडौंस्थित सुन्दरीजलमा आइपुग्दैछ ।

२६ किलोमिटर लामो सुरुङमा फागुन १० गते हुलिएको पानी सुन्दरीजलमा झरेको हेर्न प्रधानमन्त्री केपी शर्मा ओली आज जाँदैछन्‌ ।

२०५१ मा मध्यावधि चुनावताका पूर्वप्रधानमन्त्री कृष्णप्रसाद भट्टराईले ‘काठमाडौंको सडक मेलम्चीको पानीले पखालिदिने’ भन्दै वाचा गरेका थिए ।

वि.सं. २०५८/५९ देखि आयोजना निर्माण थालिएपनि निरन्तर ढिलाई र भ्रष्टाचार गर्दै काठमाडौं उपत्यकाका नागरिकमाथि खेलवाडपछि बल्लतल्ल, झण्डै दुई दशकपछि काठमाडौंमा पानी झार्न लागेको हो ।

सिन्धुपाल्चोकबाट सुरुङमार्फत पठाइएको पानी झार्न तयार पारिएको स्थान सुन्दरीजलमा प्रशोधन केन्द्र बनाइएको छ । यहाँ २६ किलोमिटर लामो सुरुङमा सिन्धुपाल्चोकबाट हुलिएको पानी झर्नेछ ।

सुरुङ हुँदै आएको मेलम्चीको पानी यही केन्द्रमा प्रशोधन गरी काठमाडौं उपत्यकामा वितरण गरिनेछ । अहिले भने परीक्षणका लागि प्रतिसेकेन्ड २६० लिटर पानी मात्रै हालिएको छ ।

परीक्षण सफल भएपछि प्रतिदिन १७ करोड लिटर पानी सुन्दरीजलमा आइपुग्ने आयोजनाका अधिकारीहरूले जानकारी दिएका छन्‌ ।